bachpan ka wo zamana

aatā hai yaad mujh ko bachpan kā vo zamāna

rahtā thā saath mere ḳhushiyoñ kā jab ḳhazāna

har roz ghar meñ milte umda lazīz khāne

be-mehnat-o-mashaqqat hāsil thā āb-o-dāna

bachchoñ ke saath rahnā ḳhushiyoñ ke giit gaanā

dil meñ na thī kudūrat thā sab se dostāna

mehñdī ke patte laanā aur piis kar lagānā

phir surḳh haath apne har ek ko dikhānā

āvāz DugDugī kī juuñ hī sunā.ī detī

us kī taraf lapaknā bachchoñ kā vālihāna

har saal pyāre abbū laate the ek bakrā

chāra use khilānā maidān meñ ghumānā

vo duur jā chukā hai aatā nahīñ palaT kar

bachpan kā vo zamāna lagtā hai ik fasāna

daadī ko maiñ ne ik din ye mashvara diyā thā

chehre kī jhurriyoñ ko āsān hai miTānā

chehre pe aap ke haiñ jo be-shumār shikneñ

aayā mirī samajh meñ un se najāt paanā

kapḌe kī saarī shikneñ miTtī haiñ istirī se

āsān sā amal hai ye istirī chalānā

ik garm istirī ko chehre pe aap phereñ

umda hai merā nusḳha hai shart āzmānā

ik roz vālida se jā kar kahā kitchen meñ

ab chhoḌiyegā ammī ye roTiyāñ pakānā

ik peḌ roTiyoñ kā dālān meñ lagā.eñ

us peḌ ko kaheñge roTī kā kārḳhāna

shāḳhoñ se taaza taaza phir roTiyāñ mileñgī

toḌeñge roTiyāñ ham khā.eñge ghar meñ khānā

kaisī ajiib bāteñ aatī thiiñ mere lab par

aaj un ko kah rahā huuñ bāteñ haiñ ahmaqāna

vo pyārī pyārī bāteñ ab yaad aa rahī haiñ

bachpan kā vo zamāna kyā ḳhvāb thā suhānā

aata hai yaad mujh ko bachpan ka wo zamana

rahta tha sath mere KHushiyon ka jab KHazana

har roz ghar mein milte umda laziz khane

be-mehnat-o-mashaqqat hasil tha aab-o-dana

bachchon ke sath rahna KHushiyon ke git gana

dil mein na thi kudurat tha sab se dostana

mehndi ke patte lana aur pis kar lagana

phir surKH hath apne har ek ko dikhana

aawaz DugDugi ki jun hi sunai deti

us ki taraf lapakna bachchon ka walihana

har sal pyare abbu late the ek bakra

chaara use khilana maidan mein ghumana

wo dur ja chuka hai aata nahin palaT kar

bachpan ka wo zamana lagta hai ek fasana

dadi ko main ne ek din ye mashwara diya tha

chehre ki jhurriyon ko aasan hai miTana

chehre pe aap ke hain jo be-shumar shiknen

aaya meri samajh mein un se najat pana

kapDe ki sari shiknen miTti hain istiri se

aasan sa amal hai ye istiri chalana

ek garm istiri ko chehre pe aap pheren

umda hai mera nusKHa hai shart aazmana

ek roz walida se ja kar kaha kitchen mein

ab chhoDiyega ammi ye roTiyan pakana

ek peD roTiyon ka dalan mein lagaen

us peD ko kahenge roTi ka karKHana

shaKHon se taza taza phir roTiyan milengi

toDenge roTiyan hum khaenge ghar mein khana

kaisi ajib baaten aati thin mere lab par

aaj un ko kah raha hun baaten hain ahmaqana

wo pyari pyari baaten ab yaad aa rahi hain

bachpan ka wo zamana kya KHwab tha suhana