naya plan

aao nayā mansūba banā.eñ

duniyā ko ik raah dikhā.eñ

jang ke bādal duur kareñ ham

zulmat ko pur-nūr kareñ ham

amn kā parcham lahrā.eñ ham

nā-samjhoñ ko samjhā.eñ ham

zulm kī har buniyād miTā.eñ

aao nayā mansūba banā.eñ

suukh rahī hai Daalī Daalī

zard hai bāġhoñ kī hariyālī

koyal bulbul chup haiñ saare

titlī bhañvre haiñ dukhyāre

sūkhī huī kaliyoñ ko khilā.eñ

aao nayā mansūba banā.eñ

jag-mag jag-mag rangīñ rāteñ

sūraj kī dilkash sauġhāteñ

ambar ke sansār meñ jā kar

tāroñ ke bāzār meñ jā kar

pyāre chandā ko dekh aa.eñ

aao nayā mansūba banā.eñ

ammī baajī daadī naanī

kahtī haiñ bhūtoñ kī kahānī

'kaifī' aur 'sāhir' ke tarāne

aao chalo un sab ko sunāne

aur apne bhī giit sunā.eñ

aao nayā mansūba banā.eñ

duniyā ko ik raah dikhā.eñ

aao naya mansuba banaen

duniya ko ek rah dikhaen

jang ke baadal dur karen hum

zulmat ko pur-nur karen hum

amn ka parcham lahraen hum

na-samjhon ko samjhaen hum

zulm ki har buniyaad miTaen

aao naya mansuba banaen

sukh rahi hai Dali Dali

zard hai baghon ki hariyali

koyal bulbul chup hain sare

titli bhanwre hain dukhyare

sukhi hui kaliyon ko khilaen

aao naya mansuba banaen

jag-mag jag-mag rangin raaten

suraj ki dilkash saughaten

ambar ke sansar mein ja kar

taron ke bazar mein ja kar

pyare chanda ko dekh aaen

aao naya mansuba banaen

ammi baji dadi nani

kahti hain bhuton ki kahani

'kaifi' aur 'sahir' ke tarane

aao chalo un sab ko sunane

aur apne bhi git sunaen

aao naya mansuba banaen

duniya ko ek rah dikhaen