sal-e-nau mubarak

mubārak mubārak nayā saal sab ko

na chāhā thā ham ne tū ham se judā ho

magar kis ne rokā hai bahtī havā ko

jo ham chāhte haiñ vo kaise bhalā ho

ai jaate baras tujh ko sauñpā ḳhudā ko

mubārak mubārak nayā saal sab ko

mubārak ghaḌī meñ ye ham ahd kar leñ

ba-sad-shān ham zindagī meñ sañvar leñ

guloñ kī tarah gulistāñ meñ nikhar leñ

baneñ ham bhī sūraj gagan meñ ubhar leñ

mubārak mubārak nayā saal sab ko

añdheroñ ne luuTī ujāloñ kī daulat

uḌā le gayā vaqt ik ḳhvāb-e-rāhat

na lauTegī biitī huī koī saa.at

jo ab bhī na jaage to hogī qayāmat

mubārak mubārak nayā saal sab ko

umīdeñ haiñ rāheñ azā.em savārī

ḳhabar de rahī hai ye bād-e-bahārī

mahaktī huī manzileñ pyārī pyārī

ki sadiyoñ se taktī haiñ rāheñ hamārī

mubārak mubārak nayā saal sab ko

mubārak mubārak nayā saal sab ko

mubarak mubarak naya sal sab ko

na chaha tha hum ne tu hum se juda ho

magar kis ne roka hai bahti hawa ko

jo hum chahte hain wo kaise bhala ho

ai jate baras tujh ko saunpa KHuda ko

mubarak mubarak naya sal sab ko

mubarak ghaDi mein ye hum ahd kar len

ba-sad-shan hum zindagi mein sanwar len

gulon ki tarah gulistan mein nikhar len

banen hum bhi suraj gagan mein ubhar len

mubarak mubarak naya sal sab ko

andheron ne luTi ujalon ki daulat

uDa le gaya waqt ek KHwab-e-rahat

na lauTegi biti hui koi saat

jo ab bhi na jage to hogi qayamat

mubarak mubarak naya sal sab ko

umiden hain rahen azaem sawari

KHabar de rahi hai ye baad-e-bahaari

mahakti hui manzilen pyari pyari

ki sadiyon se takti hain rahen hamari

mubarak mubarak naya sal sab ko

mubarak mubarak naya sal sab ko