aawaz-e-adam

dabegī kab talak āvāz-e-ādam ham bhī dekheñge

rukeñge kab talak jazbāt-e-barham ham bhī dekheñge

chalo yūñhī sahī ye jaur-e-paiham ham bhī dekheñge

dar-e-zindāñ se dekheñ yā urūj-e-dār se dekheñ

tumheñ rusvā sar-e-bāzār-e-ālam ham bhī dekheñge

zarā dam lo ma.āl-e-shaukat-e-jam ham bhī dekheñge

ye zo.am-e-quvvat-e-faulād-o-āhan dekh lo tum bhī

ba-faiz-e-jazba-e-īmān-e-mohkam ham bhī dekheñge

jabīn-e-kaj-kulāhī ḳhaak par ḳham ham bhī dekheñge

mukāfāt-e-amal tārīḳh-e-insāñ kī rivāyat hai

karoge kab talak nāvak farāham ham bhī dekheñge

kahāñ tak hai tumhāre zulm meñ dam ham bhī dekheñge

ye hañgām-e-vidā-e-shab hai ai zulmat ke farzando

sahar ke dosh par gulnār parcham ham bhī dekheñge

tumheñ bhī dekhnā hogā ye aalam ham bhī dekheñge

dabegi kab talak aawaz-e-adam hum bhi dekhenge

rukenge kab talak jazbaat-e-barham hum bhi dekhenge

chalo yunhi sahi ye jaur-e-paiham hum bhi dekhenge

dar-e-zindan se dekhen ya uruj-e-dar se dekhen

tumhein ruswa sar-e-bazar-e-alam hum bhi dekhenge

zara dam lo maal-e-shaukat-e-jam hum bhi dekhenge

ye zoam-e-quwwat-e-faulad-o-ahan dekh lo tum bhi

ba-faiz-e-jazba-e-iman-e-mohkam hum bhi dekhenge

jabin-e-kaj-kulahi KHak par KHam hum bhi dekhenge

mukafat-e-amal tariKH-e-insan ki riwayat hai

karoge kab talak nawak faraham hum bhi dekhenge

kahan tak hai tumhaare zulm mein dam hum bhi dekhenge

ye hangam-e-wida-e-shab hai ai zulmat ke farzando

sahar ke dosh par gulnar parcham hum bhi dekhenge

tumhein bhi dekhna hoga ye aalam hum bhi dekhenge