baDa shahr

karachi kisī dev-qad kekḌe kī tarah

samundar ke sāhil pe paañv pasāre paḌā hai

naseñ us kī faulād-o-āhan

badan ret cement patthar

baseñ Texiyāñ kāreñ rickshaw ragoñ meñ lahū kī bajā.e ravāñ

jism par jā-ba-jā daaġh daldal-numā

jahāñ ankabūt apne tāroñ se bunte haiñ bankoñ ke jaal

ki un meñ shumāl aur mashriq se aa.e hue

ishtihā aur ḳhvāboñ ke maare magas

phaḌ.phaḌāte raheñ

mustaqil ālam-e-jāñ-kanī meñ raheñ

shaam hote hī is kī nam-ālūd aur khurdurī khaal se

is ke be-Dhañg a.azā se

ishva-faroshoñ ke pairāhanoñ kī tarah

raushnī phūTtī hai

ye vo shahr-e-ḳhud-mutma.in hai

jo apne hī dil kī shaqāvat pe shaidā rahā

maiñ chāhat ke phūloñ bhare jañgaloñ se jab aayā

to is shahr kī piiTh

majlis kī dīvār kī tarah merī taraf thī

maiñ shiddat kī tanhā.ī meñ

āshnā harf kā ārzū-mand

paiham taġhāful se ranjīda be-dil

yahāñ ke rusūm aur ādāb se be-ḳhabar

nāḳhunoñ se zamīn khod kar

āñsuoñ kī namī se use sīñch kar

harf kaliyoñ kī ummīd meñ

dard boltā rahā

ka.ī baar maiñ ne samundar kī bhīgī havāoñ se pūchhā

ki ai ḳhush-nafas rahravo

tum is tarah begāna-vash kyuuñ guzartī ho

pal bhar ruko

koī taskīñ kā paiġhām do

aur apnā ye amrit sā haath

dukhe dil pe rakh do

pa vo shahr kī saañs meñ

enginoñ ke dhueñ kī kasāfat se afsurda

āñkheñ churā.e guzartī rahīñ

ka.ī baar yuuñ bhī huā hai

ki maiñ aur ye shahr ik mushtarak dukh kī zanjīr meñ bañdh ga.e

aur mujhe ye gumāñ sā huā

ki ab ajnabiyyat kī dīvār girne ko hai

abhī us kī namnāk āñkheñ kaheñgī ki ham ek haiñ

lamha-e-dard kā saath sab se baḌā saath hai

magar maiñ ne dekhā ki is vaqt bhī

us kī pathrā.ī āñkhoñ meñ

aks-e-shanāsā.ī nāpaid thā

aur ab jab maiñ is shahr se jā rahā huuñ

to is kī darāñtī sī bāñhoñ ke dandāne

mere rag-o-pai meñ utre hue haiñ

karachi kisi dew-qad kekDe ki tarah

samundar ke sahil pe panw pasare paDa hai

nasen us ki faulad-o-ahan

badan ret cement patthar

basen Texiyan karen rickshaw ragon mein lahu ki bajae rawan

jism par ja-ba-ja dagh daldal-numa

jahan ankabut apne taron se bunte hain bankon ke jal

ki un mein shumal aur mashriq se aae hue

ishtiha aur KHwabon ke mare magas

phaDphaDate rahen

mustaqil aalam-e-jaan-kani mein rahen

sham hote hi is ki nam-alud aur khurduri khaal se

is ke be-Dhang aaza se

ishwa-faroshon ke pairahanon ki tarah

raushni phuTti hai

ye wo shahr-e-KHud-mutmain hai

jo apne hi dil ki shaqawat pe shaida raha

main chahat ke phulon bhare jangalon se jab aaya

to is shahr ki piTh

majlis ki diwar ki tarah meri taraf thi

main shiddat ki tanhai mein

aashna harf ka aarzu-mand

paiham taghaful se ranjida be-dil

yahan ke rusum aur aadab se be-KHabar

naKHunon se zamin khod kar

aansuon ki nami se use sinch kar

harf kaliyon ki ummid mein

dard bolta raha

kai bar main ne samundar ki bhigi hawaon se puchha

ki ai KHush-nafas rahrawo

tum is tarah begana-wash kyun guzarti ho

pal bhar ruko

koi taskin ka paigham do

aur apna ye amrit sa hath

dukhe dil pe rakh do

pa wo shahr ki sans mein

enginon ke dhuen ki kasafat se afsurda

aankhen churae guzarti rahin

kai bar yun bhi hua hai

ki main aur ye shahr ek mushtarak dukh ki zanjir mein bandh gae

aur mujhe ye guman sa hua

ki ab ajnabiyyat ki diwar girne ko hai

abhi us ki namnak aankhen kahengi ki hum ek hain

lamha-e-dard ka sath sab se baDa sath hai

magar main ne dekha ki is waqt bhi

us ki pathrai aankhon mein

aks-e-shanasai napaid tha

aur ab jab main is shahr se ja raha hun

to is ki daranti si banhon ke dandane

mere rag-o-pai mein utre hue hain