KHuda ka sawal

mire rab kī mujh par ināyat huī

kahūñ bhī to kaise ibādat huī

haqīqat huī jaise mujh par ayaañ

qalam ban gayā hai ḳhudā kī zabāñ

muḳhātib hai bande se parvardigār

tū husn-e-chaman tū hī rang-e-bahār

tū me.arāj-e-fan tū hī fan kā siñghār

musavvir huuñ maiñ tū mirā shāhkār

ye sub.heñ ye shāmeñ ye din aur raat

ye rangīn dilkash hasīñ kā.enāt

ki hūr-o-malā.ik vo jinnāt meñ

kiyā hai tujhe ashraf-ul-maḳhluqāt

mirī azmatoñ kā havāla hai tū

tū hī raushnī hai ujālā hai tū

farishtoñ se sajda bhī karvā diyā

ki tere liye maiñ ne kyā na kiyā

ye duniyā jahāñ bazm-ārā.īyāñ

ye mahfil ye mele ye tanhā.iyāñ

falak kā tujhe shāmiyāna diyā

zamīñ par tujhe āb-o-dāna diyā

mile ābshāroñ se bhī hausle

pahāḌoñ meñ tujh ko diye rāste

ye paanī havā aur ye shams-o-qamar

ye mauj-e-ravāñ ye kināra bhañvar

ye shāḳhoñ pe ġhunche chaTaḳhte hue

falak pe sitāre chamakte hue

ye sabze ye phūloñ-bharī kyāriyāñ

ye panchhī ye uḌtī huī titliyāñ

ye sho.ala ye shabnam ye miTTī ye sang

ye jharnoñ ke bajte hue jal-tarañg

ye jhīloñ meñ hañste hue se kañval

ye dhartī pe mausam kī likkhī ġhazal

ye sardī ye garmī ye bārish ye dhuup

ye chehra ye qad aur ye rañg-rūp

darindoñ charindoñ pe qaabū diyā

tujhe bhaa.ī de kar ke baazū diyā

bahan dī tujhe aur sharīk-e-safar

ye rishte ye naate gharānā ye ghar

ki aulād bhī dī diye vāldain

alif laam miim kaaf aur ain ġhain

ye aql-o-zahānat shu.ūr-o-nazar

ye bastī ye sahrā ye ḳhushkī ye tar

aur is par kitāb-e-hidāyat bhī dī

nabī bhī utāre sharī.at bhī dī

ġharaz ki sabhī kuchh hai tere liye

batā kyā kiyā tū ne mere liye

mere rab ki mujh par inayat hui

kahun bhi to kaise ibaadat hui

haqiqat hui jaise mujh par ayan

qalam ban gaya hai KHuda ki zaban

muKHatib hai bande se parwardigar

tu husn-e-chaman tu hi rang-e-bahaar

tu mearaj-e-fan tu hi fan ka singhaar

musawwir hun main tu mera shahkar

ye subhen ye shamen ye din aur raat

ye rangin dilkash hasin kaenat

ki hur-o-malaik wo jinnat mein

kiya hai tujhe ashraf-ul-maKHluqat

meri azmaton ka hawala hai tu

tu hi raushni hai ujala hai tu

farishton se sajda bhi karwa diya

ki tere liye main ne kya na kiya

ye duniya jahan bazm-araiyan

ye mahfil ye mele ye tanhaiyan

falak ka tujhe shamiyana diya

zamin par tujhe aab-o-dana diya

mile aabshaaron se bhi hausle

pahaDon mein tujh ko diye raste

ye pani hawa aur ye shams-o-qamar

ye mauj-e-rawan ye kinara bhanwar

ye shaKHon pe ghunche chaTaKHte hue

falak pe sitare chamakte hue

ye sabze ye phulon-bhari kyariyan

ye panchhi ye uDti hui titliyan

ye shoala ye shabnam ye miTTi ye sang

ye jharnon ke bajte hue jal-tarang

ye jhilon mein hanste hue se kanwal

ye dharti pe mausam ki likkhi ghazal

ye sardi ye garmi ye barish ye dhup

ye chehra ye qad aur ye rang-rup

darindon charindon pe qabu diya

tujhe bhai de kar ke bazu diya

bahan di tujhe aur sharik-e-safar

ye rishte ye nate gharana ye ghar

ki aulad bhi di diye waldain

alif lam mim kaf aur ain ghain

ye aql-o-zahanat shuur-o-nazar

ye basti ye sahra ye KHushki ye tar

aur is par kitab-e-hidayat bhi di

nabi bhi utare shariat bhi di

gharaz ki sabhi kuchh hai tere liye

bata kya kiya tu ne mere liye