waba ke dinon mein

zamīn gūñgī ho rahī hai

parinde chup sādhe

ujḌī shāḳhoñ pe baiThe nauha-kunāñ haiñ

raat ke badan pe

niiñd ke pyāle auñdhe paḌe bilak rahe haiñ

auratoñ ke rahm meñ

zinda lāshoñ ke galne-saḌne se ta.affun phail rahā hai

ḳhvāb bastiyāñ ujaḌ rahī haiñ

samundaroñ ne dekhā

maut daañt nikostī dandanātī phirtī hai

buḌhiyā khiḌkī se jhāñkte chīḳhī

koī maz.hab

use lagām kyoñ nahīñ Dāltā

kaisī shutr-e-be-mahār huī phirtī hai

koī duā us kā galā kyoñ nahīñ ghoñTtī

is manhūs ko ta.avīz ghol kar pilāo

darbāroñ meñ jhāḌū detī

bevaqūf buḌhiyā

film kā vahī kirdār hiT hotā hai

jis ne

rehearsal kī ho

khiḌkī meñ sannāTā phail gayā

maut ne apnā giit jaarī rakhā

zamin gungi ho rahi hai

parinde chup sadhe

ujDi shaKHon pe baiThe nauha-kunan hain

raat ke badan pe

nind ke pyale aundhe paDe bilak rahe hain

auraton ke rahm mein

zinda lashon ke galne-saDne se taffun phail raha hai

KHwab bastiyan ujaD rahi hain

samundaron ne dekha

maut dant nikosti dandanati phirti hai

buDhiya khiDki se jhankte chiKHi

koi mazhab

use lagam kyon nahin Dalta

kaisi shutr-e-be-mahaar hui phirti hai

koi dua us ka gala kyon nahin ghonTti

is manhus ko tawiz ghol kar pilao

darbaron mein jhaDu deti

bewaquf buDhiya

film ka wahi kirdar hiT hota hai

jis ne

rehearsal ki ho

khiDki mein sannaTa phail gaya

maut ne apna git jari rakha