taj-mahal

taaj tere liye ik maz.har-e-ulfat hī sahī

tujh ko is vādi-e-rañgīñ se aqīdat hī sahī

merī mahbūb kahīñ aur milā kar mujh se

bazm-e-shāhī meñ ġharīboñ kā guzar kyā ma.anī

sabt jis raah meñ hoñ satvat-e-shāhī ke nishāñ

us pe ulfat bharī rūhoñ kā safar kyā ma.anī

merī mahbūb pas-e-parda-e-tash.hīr-e-vafā

tū ne satvat ke nishānoñ ko to dekhā hotā

murda-shāhoñ ke maqābir se bahalne vaalī

apne tārīk makānoñ ko to dekhā hotā

an-ginat logoñ ne duniyā meñ mohabbat kī hai

kaun kahtā hai ki sādiq na the jazbe un ke

lekin un ke liye tash.hīr kā sāmān nahīñ

kyūñki vo log bhī apnī hī tarah muflis the

ye imārāt o maqābir ye fasīleñ ye hisār

mutlaq-ul-hukm shahanshāhoñ kī azmat ke sutūñ

sīna-e-dahr ke nāsūr haiñ kohna nāsūr

jazb hai un meñ tire aur mire ajdād kā ḳhuuñ

merī mahbūb unheñ bhī to mohabbat hogī

jin kī sannā.ī ne baḳhshī hai use shakl-e-jamīl

un ke pyāroñ ke maqābir rahe benām-o-numūd

aaj tak un pe jalā.ī na kisī ne qindīl

ye chaman-zār ye jamunā kā kināra ye mahal

ye munaqqash dar o dīvār ye mehrāb ye taaq

ik shahanshāh ne daulat kā sahārā le kar

ham ġharīboñ kī mohabbat kā uḌāyā hai mazāq

merī mahbūb kahīñ aur milā kar mujh se

taj tere liye ek mazhar-e-ulfat hi sahi

tujh ko is wadi-e-rangin se aqidat hi sahi

meri mahbub kahin aur mila kar mujh se

bazm-e-shahi mein gharibon ka guzar kya mani

sabt jis rah mein hon satwat-e-shahi ke nishan

us pe ulfat bhari ruhon ka safar kya mani

meri mahbub pas-e-parda-e-tashhir-e-wafa

tu ne satwat ke nishanon ko to dekha hota

murda-shahon ke maqabir se bahalne wali

apne tarik makanon ko to dekha hota

an-ginat logon ne duniya mein mohabbat ki hai

kaun kahta hai ki sadiq na the jazbe un ke

lekin un ke liye tashhir ka saman nahin

kyunki wo log bhi apni hi tarah muflis the

ye imaraat o maqabir ye fasilen ye hisar

mutlaq-ul-hukm shahanshahon ki azmat ke sutun

sina-e-dahr ke nasur hain kohna nasur

jazb hai un mein tere aur mere ajdad ka KHun

meri mahbub unhen bhi to mohabbat hogi

jin ki sannai ne baKHshi hai use shakl-e-jamil

un ke pyaron ke maqabir rahe benam-o-numud

aaj tak un pe jalai na kisi ne qindil

ye chaman-zar ye jamuna ka kinara ye mahal

ye munaqqash dar o diwar ye mehrab ye taq

ek shahanshah ne daulat ka sahaara le kar

hum gharibon ki mohabbat ka uDaya hai mazaq

meri mahbub kahin aur mila kar mujh se