jine wale

kyā ḳhabar sub.h ke sitāre ko

hai use fursat-e-nazar kitnī

phailtī ḳhushbuoñ ko kyā ma.alūm

hai unheñ mohlat-e-safar kitnī

barq-e-betāb ko ḳhabar na huī

ki hai umr-e-dam-e-sharar kitnī

kabhī sochā na piine vaale ne

jaam meñ mai to hai magar kitnī

dekh saktī nahīñ ma.āl-e-bahār

garche nargis hai dīda-var kitnī

jaane kyā zindagī kī jāgtī aañkh

ho ga.ī us kī shab basar kitnī

sham-e-ḳhud-soz ko pata na chalā

duur hai manzil-e-sahar kitnī

muskurātī kalī ko is se ġharaz

ki hai umr us kī muḳhtasar kitnī

jiine vāloñ ko kaam jiine se

zindagī kā nizām jiine se

kya KHabar subh ke sitare ko

hai use fursat-e-nazar kitni

phailti KHushbuon ko kya malum

hai unhen mohlat-e-safar kitni

barq-e-betab ko KHabar na hui

ki hai umr-e-dam-e-sharar kitni

kabhi socha na pine wale ne

jam mein mai to hai magar kitni

dekh sakti nahin maal-e-bahaar

garche nargis hai dida-war kitni

jaane kya zindagi ki jagti aankh

ho gai us ki shab basar kitni

sham-e-KHud-soz ko pata na chala

dur hai manzil-e-sahar kitni

muskuraati kali ko is se gharaz

ki hai umr us ki muKHtasar kitni

jine walon ko kaam jine se

zindagi ka nizam jine se