hū-ba-hū aap hī kī mūrat hai

zindagī kitnī ḳhūb-sūrat hai

hu-ba-hu aap hi ki murat hai

zindagi kitni KHub-surat hai

libās meñ hai vo tarz-e-tapāk-e-ārā.ish

jo añg chāhe chhupānā jhalak jhalak jaa.e

libas mein hai wo tarz-e-tapak-e-araish

jo ang chahe chhupana jhalak jhalak jae

raat din phir rahā huuñ galiyoñ meñ

merā ik shaḳhs kho gayā hai yahāñ

raat din phir raha hun galiyon mein

mera ek shaKHs kho gaya hai yahan

jal kar girā huuñ sūkhe shajar se uḌā nahīñ

maiñ ne vahī kiyā jo taqāzā vafā kā thā

jal kar gira hun sukhe shajar se uDa nahin

main ne wahi kiya jo taqaza wafa ka tha

kahīñ to harf-e-āḳhir huuñ maiñ 'akbar'

kisī kā nuqta-e-āġhāz huuñ maiñ

kahin to harf-e-aKHir hun main 'akbar'

kisi ka nuqta-e-aghaz hun main