aaj bhī naqsh haiñ dil par tirī aahaT ke nishāñ

ham ne us raah se auroñ ko guzarne na diyā

aaj bhi naqsh hain dil par teri aahaT ke nishan

hum ne us rah se auron ko guzarne na diya

yaad rakhnā bhī ik ibādat hai

kyuuñ na ham un kā hāfiza ho jaa.eñ

yaad rakhna bhi ek ibaadat hai

kyun na hum un ka hafiza ho jaen

aao to mere sahn meñ ho jaa.e raushnī

muddat guzar ga.ī hai charāġhāñ kiye hue

aao to mere sahn mein ho jae raushni

muddat guzar gai hai charaghan kiye hue

ik lafz yaad thā mujhe tark-e-vafā magar

bhūlā huā huuñ Thokareñ khāne ke ba.ad bhī

ek lafz yaad tha mujhe tark-e-wafa magar

bhula hua hun Thokaren khane ke baad bhi

saverā le ke aatā hai mire ḳhvāboñ kī ta.abīreñ

magar jab shaam hotī hai to un kī yaad aatī hai

sawera le ke aata hai mere KHwabon ki tabiren

magar jab sham hoti hai to un ki yaad aati hai

hosh-o-havās khone lagā huuñ firāq meñ

tanhā.iyoñ ne aisā muqaffal kiyā mujhe

hosh-o-hawas khone laga hun firaq mein

tanhaiyon ne aisa muqaffal kiya mujhe

zindagī kī haqīqat ajab ho ga.ī

aaj kal ho rahī hai basar ḳhvāb meñ

zindagi ki haqiqat ajab ho gai

aaj kal ho rahi hai basar KHwab mein

tamām din kī mashaqqat-bharī takān ke ba.ad

tamām raat mohabbat se phir jagā.ūñ use

tamam din ki mashaqqat-bhari takan ke baad

tamam raat mohabbat se phir jagaun use

har shaḳhs mo'tarif ki muhibb-e-vatan huuñ maiñ

phir adliya ne kyuuñ sar-e-maqtal kiyā mujhe

har shaKHs mo'tarif ki muhibb-e-watan hun main

phir adliya ne kyun sar-e-maqtal kiya mujhe