راستہ سنسان تھا تو مڑ کے دیکھا کیوں نہیں

مجھ کو تنہا دیکھ کر اس نے پکارا کیوں نہیں

ہزار بار نگاہوں سے چوم کر دیکھا

لبوں پہ اس کے وہ پہلی سی اب مٹھاس نہیں

دوستوں کے ساتھ دن میں بیٹھ کر ہنستا رہا

اپنے کمرے میں وہ جا کر خوب رویا رات بھر

دھوپ کے بادل برس کر جا چکے تھے اور میں

اوڑھ کر شبنم کی چادر چھت پہ سویا رات بھر

اپنا مکان بھی تھا اسی موڑ پر مگر

جانے میں کس خیال میں اوروں کے گھر گیا

سلسلہ رونے کا صدیوں سے چلا آتا ہے

کوئی آنسو مری پلکوں پہ ٹھہرتا ہی نہیں

میں نے اپنی خواہشوں کا قتل خود ہی کر دیا

ہاتھ خون آلود ہیں ان کو ابھی دھویا نہیں

ہمارے بیچ وہ چپ چاپ بیٹھا رہتا ہے

میں سوچتا ہوں مگر کچھ مجھے پتا نہ لگے

کسی طرح نہ طلسم سکوت ٹوٹ سکا

وہ دے رہا تھا بہت دور سے صدا مجھ کو

نہ دشت و در سے الگ تھا نہ جنگلوں سے جدا

وہ اپنے شہر میں رہتا تھا پھر بھی تنہا تھا

پھینکا تھا کس نے سنگ ہوس رات خواب میں

پھر ڈھونڈھتی ہے نیند اسی پچھلے پہر کو

کوئی دیوار سلامت ہے نہ اب چھت میری

خانۂ خستہ کی صورت ہوئی حالت میری