āñsuoñ se likh rahe haiñ bebasī kī dāstāñ

lag rahā hai dard kī tasvīr ban jā.eñge ham

aansuon se likh rahe hain bebasi ki dastan

lag raha hai dard ki taswir ban jaenge hum

ajiib hālat hai jism-o-jāñ kī hazār pahlū badal rahā huuñ

vo mere andar utar gayā hai maiñ ḳhud se bāhar nikal rahā huuñ

ajib haalat hai jism-o-jaan ki hazar pahlu badal raha hun

wo mere andar utar gaya hai main KHud se bahar nikal raha hun

mere jism se vaqt ne kapḌe noch liye

manzar manzar ḳhud merī poshāk huā

mere jism se waqt ne kapDe noch liye

manzar manzar KHud meri poshak hua

saare dukh so jā.eñge lekin ik aisā ġham bhī hai

jo mire bistar pe sadiyoñ kā safar rakh jā.egā

sare dukh so jaenge lekin ek aisa gham bhi hai

jo mere bistar pe sadiyon ka safar rakh jaega

ye jo dīvār añdheroñ ne uThā rakkhī hai

merā maqsad isī dīvār meñ dar karnā hai

ye jo diwar andheron ne uTha rakkhi hai

mera maqsad isi diwar mein dar karna hai