bahut thā ḳhauf jis kā phir vahī qissā nikal aayā

mire dukh se kisī āvāz kā rishtā nikal aayā

bahut tha KHauf jis ka phir wahi qissa nikal aaya

mere dukh se kisi aawaz ka rishta nikal aaya

de nishānī koī aisī ki sadā yaad rahe

zaḳhm kī baat hai kyā zaḳhm to bhar jā.eñge

de nishani koi aisi ki sada yaad rahe

zaKHm ki baat hai kya zaKHm to bhar jaenge

jaane kin rishtoñ ne mujh ko bāñdh rakkhā hai ki maiñ

muddatoñ se āñdhiyoñ kī zad meñ huuñ bikhrā nahīñ

jaane kin rishton ne mujh ko bandh rakkha hai ki main

muddaton se aandhiyon ki zad mein hun bikhra nahin

kahte kahte kuchh badal detā hai kyuuñ bātoñ kā ruḳh

kyuuñ ḳhud apne-āp ke bhī saath vo sachchā nahīñ

kahte kahte kuchh badal deta hai kyun baaton ka ruKH

kyun KHud apne-ap ke bhi sath wo sachcha nahin

karoge yaad to har baat yaad aa.egī

guzarte vaqt kī har mauj Thahar jā.egī

karoge yaad to har baat yaad aaegi

guzarte waqt ki har mauj Thahar jaegi