pichhlā baras to ḳhuun rulā kar guzar gayā

kyā gul khilā.egā ye nayā saal dosto

pichhla baras to KHun rula kar guzar gaya

kya gul khilaega ye naya sal dosto

baras rahī hai udāsī tamām āñgan meñ

vo rat-jagoñ kī havelī baḌe azaab meñ hai

baras rahi hai udasi tamam aangan mein

wo rat-jagon ki haweli baDe azab mein hai

is liye kāTtā huuñ ye ghaḌiyāñ

vaqt kī chaal kāmyāb na ho

is liye kaTta hun ye ghaDiyan

waqt ki chaal kaamyab na ho

kuchh to mahfūz rakhiye siine meñ

zindagānī khulī kitāb na ho

kuchh to mahfuz rakhiye sine mein

zindagani khuli kitab na ho

āñkhoñ ko yuuñ bhā gayā us kā rūp-anūp

sardī meñ achchhī lage jaise kachchī dhuup

aankhon ko yun bha gaya us ka rup-anup

sardi mein achchhi lage jaise kachchi dhup

samay ke dhāre dekh kar hotā hai vishvās

ek na ek din dekhnā sher chareñge ghaas

samay ke dhaare dekh kar hota hai wishwas

ek na ek din dekhna sher charenge ghas

kis ko ab dikhlā.eñ ham apne dil kā ḳhuun

sunte aa.e haiñ yahī andhā hai qānūn

kis ko ab dikhlaen hum apne dil ka KHun

sunte aae hain yahi andha hai qanun