مرے لبوں کا تبسم تو سب نے دیکھ لیا

جو دل پہ بیت رہی ہے وہ کوئی کیا جانے

کوئی سمجھائے یہ کیا رنگ ہے میخانے کا

آنکھ ساقی کی اٹھے نام ہو پیمانے کا

چشم ساقی مجھے ہر گام پہ یاد آتی ہے

راستا بھول نہ جاؤں کہیں میخانے کا

کون جانے کہ اک تبسم سے

کتنے مفہوم غم نکلتے ہیں

در محبوب ہے اپنا تو کنارا اقبالؔ

بے سہارا ہوئے تو ڈوب کے جانا ہوگا

کہیں بے ترک کدورت بھی ملے ہیں دو دل

در بنانا ہے تو دیوار کو ڈھانا ہوگا

اقبالؔ ہمارا جوش طلب کیا جانے کدھر لے جائے گا

نکلے ہیں تلاش منزل میں اور راہ گزر معلوم نہیں

ہم کو تجدید ملاقات سے کب ہے انکار

لیکن اب پہلے انہیں ہاتھ بڑھانا ہوگا

ممکن ہو تو اک لمحے کو ذرا تکلیف تبسم کر لیجے

ہم میں سے ابھی تک کتنوں کو مفہوم سحر معلوم نہیں