dekhā nahīñ vo chāñd sā chehrā ka.ī din se

tārīk nazar aatī hai duniyā ka.ī din se

dekha nahin wo chand sa chehra kai din se

tarik nazar aati hai duniya kai din se

ġhairoñ kī shikasta hālat par hañsnā to hamārā sheva thā

lekin hue ham āzurda bahut jab apne ghar kī baat chalī

ghairon ki shikasta haalat par hansna to hamara shewa tha

lekin hue hum aazurda bahut jab apne ghar ki baat chali

tirī talāsh meñ nikle to itnī duur ga.e

ki ham se tai na hue fāsle judā.ī ke

teri talash mein nikle to itni dur gae

ki hum se tai na hue fasle judai ke

udāsiyāñ haiñ jo din meñ to shab meñ tanhā.ī

basā ke dekh liyā shahr-e-ārzū maiñ ne

udasiyan hain jo din mein to shab mein tanhai

basa ke dekh liya shahr-e-arzu main ne

vo sādgī meñ bhī hai ajab dilkashī liye

is vāste ham us kī tamannā meñ jī liye

wo sadgi mein bhi hai ajab dilkashi liye

is waste hum us ki tamanna mein ji liye