shajar ne lahlahā kar aur havā ne chuum kar mujh ko

tirī aamad ke afsāne sunā.e jhuum kar mujh ko

shajar ne lahlaha kar aur hawa ne chum kar mujh ko

teri aamad ke afsane sunae jhum kar mujh ko

pahle to chhīn lī mirī āñkhoñ kī raushnī

phir ā.īne ke sāmne laayā gayā mujhe

pahle to chhin li meri aankhon ki raushni

phir aaine ke samne laya gaya mujhe

aur kuchh bhī mujhe darkār nahīñ hai lekin

merī chādar mire pairoñ ke barābar kar de

aur kuchh bhi mujhe darkar nahin hai lekin

meri chadar mere pairon ke barabar kar de

tujh ko dekhā nahīñ mahsūs kiyā hai maiñ ne

aa kisī din mire ehsās ko paikar kar de

tujh ko dekha nahin mahsus kiya hai main ne

aa kisi din mere ehsas ko paikar kar de

gañvā.e baiThe haiñ āñkhoñ kī raushnī 'shāhid'

jahāñ-panāh kā insāf dekhne vaale

ganwae baiThe hain aankhon ki raushni 'shahid'

jahan-panah ka insaf dekhne wale

jīvan jiinā kaThin hai vish piinā āsān

insāñ ban kar dekh lo o 'shañkar' bhagvān

jiwan jina kaThin hai wish pina aasan

insan ban kar dekh lo o 'shankar' bhagwan

har ik shai be-mel thī kaise bantī baat

āñkhoñ se sapne baḌe niiñd se lambī raat

har ek shai be-mel thi kaise banti baat

aankhon se sapne baDe nind se lambi raat

zehn meñ tū āñkhoñ meñ tū dil meñ tirā vajūd

merā to bas naam hai har jā tū maujūd

zehn mein tu aankhon mein tu dil mein tera wajud

mera to bas nam hai har ja tu maujud

kāġhaz par likh dījiye apne saare bhed

dil meñ rahe to aañch se ho jā.eñge chhed

kaghaz par likh dijiye apne sare bhed

dil mein rahe to aanch se ho jaenge chhed

āñgan hai jal-thal bahut dīvāroñ par ghaas

ghar ke andar bhī milā 'shāhid' ko banvās

aangan hai jal-thal bahut diwaron par ghas

ghar ke andar bhi mila 'shahid' ko banwas