shah-e-shahidan

ye kis ke naam ke charche haiñ ahl-e-dil kī mahfil meñ

ye kis kā zikr sun kar dard uThtā hai har ik dil meñ

ye kis kī yaad aate hī ravāñ hote haiñ ashk-e-ġham

ye kis ke haal par sadiyoñ se hai sarf-e-bukā 'ālam

jahāñ meñ iftiḳhār-e-nau’-e-insāñ kis ko kahte haiñ

musalmāñ faḳhr se shāh-e-shahīdāñ kis ko kahte haiñ

'alī-e-murtazā kā laa'l hai zahrā kā pyārā hai

mohammad kā navāsā charḳh-e-īmāñ kā sitāra hai

bachā.ī de ke jaañ insāniyat kī aabrū jis ne

zamāne meñ kiyā islāmiyat ko surḳh-rū jis ne

‘azīz-o-aqrabā ko nazr-e-īmāñ kar diyā jis ne

ḳhudā kī raah meñ ḳhush ho ke apnā sar diyā jis ne

sahī tishna-dahānī aur fāqoñ kī aziyyat bhī

uThā.ī aah jis mazlūm ne mayyat pe mayyat bhī

zahe sabr-o-tahammul āfrīñ us ‘azm-o-himmat par

adā shukr-e-ḳhudā karte the har taaza musībat par

tasavvur kī nigāheñ dekhtī haiñ dil laraztā hai

jabīñ sajde meñ hai har zaḳhm-e-tan se ḳhuuñ Tapaktā hai

gale par ḳhanjar-e-qātil laboñ par kuchh du'ā.eñ haiñ

najāt-e-ummat-e-āsī kī haq se iltijā.eñ haiñ

tire qurbān ai insāniyat ke mohsin-e-ā’zam

hayāt-e-tāza baḳhshe qaum ko ai kaash terā ġham

ḳhudā taufīq de naqsh-e-qadam par tere chalne kī

'atā himmat ho ahl-e-qaum ko gir kar sañbhalne kī

ye kis ke nam ke charche hain ahl-e-dil ki mahfil mein

ye kis ka zikr sun kar dard uThta hai har ek dil mein

ye kis ki yaad aate hi rawan hote hain ashk-e-gham

ye kis ke haal par sadiyon se hai sarf-e-buka 'alam

jahan mein iftiKHar-e-nau’-e-insan kis ko kahte hain

musalman faKHr se shah-e-shahidan kis ko kahte hain

'ali-e-murtaza ka la'l hai zahra ka pyara hai

mohammad ka nawasa charKH-e-iman ka sitara hai

bachai de ke jaan insaniyat ki aabru jis ne

zamane mein kiya islamiyat ko surKH-ru jis ne

‘aziz-o-aqraba ko nazr-e-iman kar diya jis ne

KHuda ki rah mein KHush ho ke apna sar diya jis ne

sahi tishna-dahani aur faqon ki aziyyat bhi

uThai aah jis mazlum ne mayyat pe mayyat bhi

zahe sabr-o-tahammul aafrin us ‘azm-o-himmat par

ada shukr-e-KHuda karte the har taza musibat par

tasawwur ki nigahen dekhti hain dil larazta hai

jabin sajde mein hai har zaKHm-e-tan se KHun Tapakta hai

gale par KHanjar-e-qatil labon par kuchh du'aen hain

najat-e-ummat-e-asi ki haq se iltijaen hain

tere qurban ai insaniyat ke mohsin-e-a’zam

hayat-e-taza baKHshe qaum ko ai kash tera gham

KHuda taufiq de naqsh-e-qadam par tere chalne ki

'ata himmat ho ahl-e-qaum ko gir kar sanbhalne ki