tanhaa.ii

aaj bahut añdherā hai; bārish se

pahāḌ nazar nahīñ aa rahā iklautī āvāz

bārish kī hai zindagī ko zer-e-zamīñ le jaatī huī

aur bārish ke saath sardī aatī hai

aaj koī chāñd nahīñ hogā na taare

havā raat ko chalī

puurī sub.h gandum ke saath ulajhtī rahī

dopahar ko ḳhatm ho ga.ī lekin tūfān jaarī rahā

khetoñ ko bhigotā aur phir sharābor kartā huā

dhartī ġhā.eb ho ga.ī hai

dekhne ko kuchh nahīñ hai sirf bārish

añdherī khiḌkiyoñ ke pīchhe chamaktī hai

ye vo ārām-gāh hai jahāñ koī hal-chal nahīñ hotī

ab ham apne asl vujūd kī or lauTte haiñ

añdhere meñ rah rahe jānvar

baġhair zabān yā bīnā.ī ke

kuchh sābit nahīñ kartā ki maiñ zinda huuñ

yahāñ sirf bārish hai bārish be-ant hai

aaj bahut andhera hai; barish se

pahaD nazar nahin aa raha iklauti aawaz

barish ki hai zindagi ko zer-e-zamin le jati hui

aur barish ke sath sardi aati hai

aaj koi chand nahin hoga na tare

hawa raat ko chali

puri subh gandum ke sath ulajhti rahi

dopahar ko KHatm ho gai lekin tufan jari raha

kheton ko bhigota aur phir sharabor karta hua

dharti ghaeb ho gai hai

dekhne ko kuchh nahin hai sirf barish

andheri khiDkiyon ke pichhe chamakti hai

ye wo aaram-gah hai jahan koi hal-chal nahin hoti

ab hum apne asl wujud ki or lauTte hain

andhere mein rah rahe jaanwar

baghair zaban ya binai ke

kuchh sabit nahin karta ki main zinda hun

yahan sirf barish hai barish be-ant hai