hazaaro.n parinde

hazāroñ parinde

mere zehn ke qaidī

suntā huuñ din raat meñ

dete haiñ duhā.ī

rihā.ī

rihā.ī

ham chāhe jā kar

kahīñ chhalnī ho jaa.eñ

hamārī kaayā se bahne lageñge

ḳhuun ke favāre

ham chāhe jā kar

kahīñ jhulas jaa.eñ

jal uTheñge hamāre paroñ ke

reshmī kināre

to bas jaane de ab

kahīñ bhī hameñ

terī qaid se to

behtar haiñ hamāre liye

shikārī aur gosht-ḳhor qasā.ī

jab peḌ thā to

jab utre the ham

terī shāḳhoñ par

tab tū ne kahā thā

uḌo ākāsh meñ

jab thak jaao

mere paas aao

to phir tolo

aur havāoñ ke naam ḳhat likhte jaao

tū hamāre hamesha ke liye

parvāz karne se

pattoñ ke sūkhne

jhaḌne se Dartā thā

tū ab peḌ se

piñjrā ban gayā hai

hazaron parinde

mere zehn ke qaidi

sunta hun din raat mein

dete hain duhai

rihai

rihai

hum chahe ja kar

kahin chhalni ho jaen

hamari kaya se bahne lagenge

KHun ke faware

hum chahe ja kar

kahin jhulas jaen

jal uThenge hamare paron ke

reshmi kinare

to bas jaane de ab

kahin bhi hamein

teri qaid se to

behtar hain hamare liye

shikari aur gosht-KHor qasai

jab peD tha to

jab utre the hum

teri shaKHon par

tab tu ne kaha tha

uDo aakash mein

jab thak jao

mere pas aao

to phir tolo

aur hawaon ke nam KHat likhte jao

tu hamare hamesha ke liye

parwaz karne se

patton ke sukhne

jhaDne se Darta tha

tu ab peD se

pinjra ban gaya hai