merii dhuup

merī dhuup bīmār paḌī hai

mere sūraj ko ghaḌiyoñ ne kaaT kar rakh diyā hai

daftar ke darvāzoñ se bāhar

merī nazm merā intizār kartī būḌhī ho ga.ī

us bechārī ke lambe ḳhūb-sūrat baal

kisī ke sahlā.e baġhair hī safed ho ga.e

maiñ kursī meñ nasb ho gayā huuñ

kursī meñ nasb beToñ ko ab sāhab-zāde kaun kahegā

circus kā būḌhā sher abhī aa.egā

mez par bikhre ḳhvāb ko dekh kar

sūrajoñ peḌoñ nadiyoñ ke saa.e dekh kar

mez par bichhī lambī saḌkeñ dekh kar barham ho jā.egā

apnī qahr ālūda nazroñ se

mere ḳhvāb bhasam kar degā

maiñ ākāsh rāh-guzār maiñ jangal

simaT kar ek darāz meñ baiTh jā.ūñgā

zahr gholūñgā saañp ban jā.ūñgā

ab to mujhe morniyoñ se Dar lagtā hai

rang birange noToñ kī titliyāñ pakaḌne

lakḌī lohe aur añdhere ke jangal meñ

saare dost kam ho ga.e haiñ

dekhte dekhte apnā shahr parāyā ho gayā hai

kavītā bāhar bīmār paḌī hai

maiñ huuñ aur ek korā shīsha hai

jo merī tārīḳh se vāqif nahīñ hai

maiñ jis reg-zār se

dostoñ qāfiloñ aur ḳhvāboñ ke saath guzrā thā

us ko kuchh bhī yaad nahīñ

jis ret par mere qadmoñ ke nishān the

vo ret ab saroñ par chhā ga.ī hai

reza reza vo mire nuqūsh par gir rahī hai

maiñ ret meñ rafta rafta kam ho rahā huuñ

āḳhir ek roz ret meñ dafn ho jā.ūñgā

reg-zār meñ dafn beToñ ko

sāhabzāde kaun kahegā

meri dhup bimar paDi hai

mere suraj ko ghaDiyon ne kaT kar rakh diya hai

daftar ke darwazon se bahar

meri nazm mera intizar karti buDhi ho gai

us bechaari ke lambe KHub-surat baal

kisi ke sahlae baghair hi safed ho gae

main kursi mein nasb ho gaya hun

kursi mein nasb beTon ko ab sahab-zade kaun kahega

circus ka buDha sher abhi aaega

mez par bikhre KHwab ko dekh kar

surajon peDon nadiyon ke sae dekh kar

mez par bichhi lambi saDken dekh kar barham ho jaega

apni qahr aaluda nazron se

mere KHwab bhasam kar dega

main aakash rah-guzar main jangal

simaT kar ek daraaz mein baiTh jaunga

zahr gholunga sanp ban jaunga

ab to mujhe morniyon se Dar lagta hai

rang birange noTon ki titliyan pakaDne

lakDi lohe aur andhere ke jangal mein

sare dost kam ho gae hain

dekhte dekhte apna shahr paraya ho gaya hai

kawita bahar bimar paDi hai

main hun aur ek kora shisha hai

jo meri tariKH se waqif nahin hai

main jis reg-zar se

doston qafilon aur KHwabon ke sath guzra tha

us ko kuchh bhi yaad nahin

jis ret par mere qadmon ke nishan the

wo ret ab saron par chha gai hai

reza reza wo mere nuqush par gir rahi hai

main ret mein rafta rafta kam ho raha hun

aaKHir ek roz ret mein dafn ho jaunga

reg-zar mein dafn beTon ko

sahabzade kaun kahega