abas hai raaz ko pane ki justuju kya hai

abas hai raaz ko paane kī justujū kyā hai

ye chāk-e-dil hai use hājat-e-rafū kyā hai

ye aa.ine haiñ ki ham-chehra lashkaroñ kī safeñ

ye aks aks koī sūrat-e-adū kyā hai

mushābahat ke ye dhoke mumāsalat ke fareb

mirā tazād liye mujh sā hū-ba-hū kyā hai

maiñ ek halqa-e-be-samt apne markaz par

ye shash-jahāt haiñ kaise ye chār-sū kyā hai

ye lahm o ḳhuuñ ke kinā.e ye zehn ke uslūb

mire vajūd kā pairāya-e-numū kyā hai

ye āsmāñ se rag-e-jāñ tak ek sargoshī

sukūt-e-shab kā ye andāz-e-guftugū kyā hai

ye rahguzār-e-nafas tañgnā.e-māyūsī

magar ye vus.at-e-dāmān-e-ārzū kyā hai

hisār-e-jism o tilism-e-qabā aziiz magar

nikal bhī aao mirī jaañ kabhū kabhū kyā hai

ḳhayāl kyā hai jo alfāz tak na pahuñche 'sāz'

jab aañkh se hī na Tapkā to phir lahū kyā hai

abas hai raaz ko pane ki justuju kya hai

ye chaak-e-dil hai use hajat-e-rafu kya hai

ye aaine hain ki ham-chehra lashkaron ki safen

ye aks aks koi surat-e-adu kya hai

mushabahat ke ye dhoke mumasalat ke fareb

mera tazad liye mujh sa hu-ba-hu kya hai

main ek halqa-e-be-samt apne markaz par

ye shash-jahat hain kaise ye chaar-su kya hai

ye lahm o KHun ke kinae ye zehn ke uslub

mere wajud ka pairaya-e-numu kya hai

ye aasman se rag-e-jaan tak ek sargoshi

sukut-e-shab ka ye andaz-e-guftugu kya hai

ye rahguzar-e-nafas tangnae-mayusi

magar ye wusat-e-daman-e-arzu kya hai

hisar-e-jism o tilism-e-qaba aziz magar

nikal bhi aao meri jaan kabhu kabhu kya hai

KHayal kya hai jo alfaz tak na pahunche 'saz'

jab aankh se hi na Tapka to phir lahu kya hai