aisa bana diya tujhe qudrat KHuda ki hai

aisā banā diyā tujhe qudrat ḳhudā kī hai

kis husn kā hai husn adā kis adā kī hai

chashm-e-siyāh-e-yār se sāzish hayā kī hai

lailā ke saath meñ ye sahelī balā kī hai

tasvīr kyuuñ dikhā.eñ tumheñ naam kyuuñ batā.eñ

laa.e haiñ ham kahīñ se kisī bevafā kī hai

andāz mujh se aur haiñ dushman se aur Dhañg

pahchān mujh ko apnī parā.ī qazā kī hai

maġhrūr kyuuñ haiñ aap javānī par is qadar

ye mere naam kī hai ye merī duā kī hai

dushman ke ghar se chal ke dikhā do judā judā

ye bāñkpan kī chaal ye nāz-o-adā kī hai

rah rah ke le rahī hai mire dil meñ chuTkiyāñ

phislī huī girah tire band-e-qabā kī hai

gardan muḌī nigāh laḌī baat kuchh na kī

shoḳhī to ḳhair aap kī tamkīñ balā kī hai

hotī hai roz bāda-kashoñ kī duā qubūl

ai mohtasib ye shān-e-karīmī ḳhudā kī hai

jitne gile the un ke vo sab dil se dhul ga.e

jhepī huī nigāh talāfī jafā kī hai

chhuptā hai ḳhuun bhī kahīñ muTThī to kholiye

rañgat yahī hinā kī yahī bū hinā kī hai

kah do ki be-vazū na chhue us ko mohtasib

botal meñ band ruuh kisī pārsā kī hai

maiñ imtihān de ke unheñ kyuuñ na mar gayā

ab ġhair se bhī un ko tamannā vafā kī hai

dekho to jā ke hazrat-e-'beḳhud' na huuñ kahīñ

dāvat sharāb-ḳhāne meñ ik pārsā kī hai

aisa bana diya tujhe qudrat KHuda ki hai

kis husn ka hai husn ada kis ada ki hai

chashm-e-siyah-e-yar se sazish haya ki hai

laila ke sath mein ye saheli bala ki hai

taswir kyun dikhaen tumhein nam kyun bataen

lae hain hum kahin se kisi bewafa ki hai

andaz mujh se aur hain dushman se aur Dhang

pahchan mujh ko apni parai qaza ki hai

maghrur kyun hain aap jawani par is qadar

ye mere nam ki hai ye meri dua ki hai

dushman ke ghar se chal ke dikha do juda juda

ye bankpan ki chaal ye naz-o-ada ki hai

rah rah ke le rahi hai mere dil mein chuTkiyan

phisli hui girah tere band-e-qaba ki hai

gardan muDi nigah laDi baat kuchh na ki

shoKHi to KHair aap ki tamkin bala ki hai

hoti hai roz baada-kashon ki dua qubul

ai mohtasib ye shan-e-karimi KHuda ki hai

jitne gile the un ke wo sab dil se dhul gae

jhepi hui nigah talafi jafa ki hai

chhupta hai KHun bhi kahin muTThi to kholiye

rangat yahi hina ki yahi bu hina ki hai

kah do ki be-wazu na chhue us ko mohtasib

botal mein band ruh kisi parsa ki hai

main imtihan de ke unhen kyun na mar gaya

ab ghair se bhi un ko tamanna wafa ki hai

dekho to ja ke hazrat-e-'beKHud' na hun kahin

dawat sharab-KHane mein ek parsa ki hai