apne kirdar ki pahchan badal dete hain

apne kirdār kī pahchān badal dete haiñ

aise kuchh log haiñ īmān badal dete haiñ

jin kī takmīl kī sūrat nahīñ niklī ab tak

aaj ham dil ke vo armān badal dete haiñ

saath dete haiñ jo ḳhushiyoñ meñ hamārī paiham

dukh meñ nazreñ vahī insān badal dete haiñ

rail-gāḌī ke safar meñ ye huā hai aksar

log baiThe hue sāmān badal dete haiñ

ḳhūn-e-dil se jo jalāte haiñ azā.em ke charāġh

āmad-e-shab kā vo imkān badal dete haiñ

aaj ke logoñ meñ dekhī hai mahārat itnī

baḌī āsānī se pahchān badal dete haiñ

jin ko ījād kā da.avā hai suḳhan meñ ai 'sa.īd'

apne sheroñ ke vo arkān badal dete haiñ

apne kirdar ki pahchan badal dete hain

aise kuchh log hain iman badal dete hain

jin ki takmil ki surat nahin nikli ab tak

aaj hum dil ke wo arman badal dete hain

sath dete hain jo KHushiyon mein hamari paiham

dukh mein nazren wahi insan badal dete hain

rail-gaDi ke safar mein ye hua hai aksar

log baiThe hue saman badal dete hain

KHun-e-dil se jo jalate hain azaem ke charagh

aamad-e-shab ka wo imkan badal dete hain

aaj ke logon mein dekhi hai mahaarat itni

baDi aasani se pahchan badal dete hain

jin ko ijad ka dawa hai suKHan mein ai 'said'

apne sheron ke wo arkan badal dete hain