dhup se jism bachae rakhna kitna mushkil hai

dhuup se jism bachā.e rakhnā kitnā mushkil hai

ḳhud ko saa.e saa.e rakhnā kitnā mushkil hai

zāhir meñ jo rasta sīdhā lagtā ho us par

apne pair jamā.e rakhnā kitnā mushkil hai

āvāzoñ kī bhiiḌ meñ itne shor-sharābe meñ

apnī bhī ik raa.e rakhnā kitnā mushkil hai

ham se pūchho ham dil ko samjhāyā karte the

vahshī ko samjhā.e rakhnā kitnā mushkil hai

sirf parinde ko ma.alūm hai tez havāoñ meñ

apne par phailā.e rakhnā kitnā mushkil hai

aaj kī raat havā.eñ behad sarkash lagtī haiñ

aaj charāġh jalā.e rakhnā kitnā mushkil hai

dostiyoñ aur dushmaniyoñ kī zad meñ rah ke 'nasīm'

apnā-āp bachā.e rakhnā kitnā mushkil hai

dhup se jism bachae rakhna kitna mushkil hai

KHud ko sae sae rakhna kitna mushkil hai

zahir mein jo rasta sidha lagta ho us par

apne pair jamae rakhna kitna mushkil hai

aawazon ki bhiD mein itne shor-sharabe mein

apni bhi ek rae rakhna kitna mushkil hai

hum se puchho hum dil ko samjhaya karte the

wahshi ko samjhae rakhna kitna mushkil hai

sirf parinde ko malum hai tez hawaon mein

apne par phailae rakhna kitna mushkil hai

aaj ki raat hawaen behad sarkash lagti hain

aaj charagh jalae rakhna kitna mushkil hai

dostiyon aur dushmaniyon ki zad mein rah ke 'nasim'

apna-ap bachae rakhna kitna mushkil hai