jabin ko dar pe jhukana hi bandagi to nahin

jabīñ ko dar pe jhukānā hī bandagī to nahīñ

ye dekh merī mohabbat meñ kuchh kamī to nahīñ

hazār ġham sahī dil meñ magar ḳhushī ye hai

hamāre hoñToñ pe māñgī huī hañsī to nahīñ

miTe ye shub.h to a dost tujh se baat kareñ

hamārī pahlī mulāqāt āḳhirī to nahīñ

huī jo jashn-e-bahārāñ ke naam se mansūb

ye āshiyānoñ ke jalne kī raushnī to nahīñ

hayāt hī ke liye be-qarār hai duniyā

tire firāq kā maqsad hayāt hī to nahīñ

ġham-e-habīb kahāñ aur kahāñ ġham-e-jānāñ

musāhibat hai yaqīnan barābarī to nahīñ

ye hijr-e-yār ye pābandiyāñ ibādat kī

kisī ḳhatā kī sazā hai ye zindagī to nahīñ

tumhārī bazm meñ afsāna kahte Dartā huuñ

ye sochtā huuñ yahāñ koī ajnabī to nahīñ

jabin ko dar pe jhukana hi bandagi to nahin

ye dekh meri mohabbat mein kuchh kami to nahin

hazar gham sahi dil mein magar KHushi ye hai

hamare honTon pe mangi hui hansi to nahin

miTe ye shubh to a dost tujh se baat karen

hamari pahli mulaqat aaKHiri to nahin

hui jo jashn-e-bahaaran ke nam se mansub

ye aashiyanon ke jalne ki raushni to nahin

hayat hi ke liye be-qarar hai duniya

tere firaq ka maqsad hayat hi to nahin

gham-e-habib kahan aur kahan gham-e-jaanan

musahibat hai yaqinan barabari to nahin

ye hijr-e-yar ye pabandiyan ibaadat ki

kisi KHata ki saza hai ye zindagi to nahin

tumhaari bazm mein afsana kahte Darta hun

ye sochta hun yahan koi ajnabi to nahin