kai aks mah-e-tamam the mujhe kha gae

ka.ī aks māh-e-tamām the mujhe khā ga.e

vo jo ḳhvāb se lab-e-bām the mujhe khā ga.e

koī raakh thī jo sulag rahī thī idhar udhar

vo jo rañg-e-sāya-e-shām the mujhe khā ga.e

vo jo āñsuoñ kī zabān thī mujhe pī ga.ī

vo jo bebasī ke kalām the mujhe khā ga.e

vo jo manziloñ kī duā.eñ thiiñ nahīñ le ga.iiñ

vo jo rāste ke salām the mujhe khā ga.e

vo jo bikhre bikhre se log the mire rog the

vo jo muttasil dar-o-bām the mujhe khā ga.e

kabhī ye ġhalat kabhī vo ġhalat kabhī sab ġhalat

ye ḳhayāl-e-puḳhta jo ḳhaam the mujhe khā ga.e

kai aks mah-e-tamam the mujhe kha gae

wo jo KHwab se lab-e-baam the mujhe kha gae

koi rakh thi jo sulag rahi thi idhar udhar

wo jo rang-e-saya-e-sham the mujhe kha gae

wo jo aansuon ki zaban thi mujhe pi gai

wo jo bebasi ke kalam the mujhe kha gae

wo jo manzilon ki duaen thin nahin le gain

wo jo raste ke salam the mujhe kha gae

wo jo bikhre bikhre se log the mere rog the

wo jo muttasil dar-o-baam the mujhe kha gae

kabhi ye ghalat kabhi wo ghalat kabhi sab ghalat

ye KHayal-e-puKHta jo KHam the mujhe kha gae