kali kali mein nihan hichkichahaTen pahchan

kalī kalī meñ nihāñ hichkichāhaTeñ pahchān

tū shāḳh-e-gul pe gul-e-nau kī āhaTeñ pahchān

lahū kī aañkh se paḌh mere zabt kī tahrīr

laboñ pe lafz na gin kapkapāhaTeñ pahchān

maiñ pankhuḌī kī tarah apne hoñT vā kar duuñ

tū titliyoñ kī tarah gungunāhaTeñ pahchān

mahāz khol diyā hai to gahrī niiñd na so

havā ke bhes meñ haiñ sansanāhaTeñ pahchān

ye jhūTe nag haiñ magar husn se tarāshe haiñ

tū jauharī hai agar jagmagāhaTeñ pahchān

vo kaalā saañp hai tujh ko nazar na aa.egā

tū jhāḌiyoñ meñ chhupī sarsarāhaTeñ pahchān

'nazīr' log to chehre badalte rahte haiñ

tū itnā saada na ban muskurāhaTeñ pahchān

kali kali mein nihan hichkichahaTen pahchan

tu shaKH-e-gul pe gul-e-nau ki aahaTen pahchan

lahu ki aankh se paDh mere zabt ki tahrir

labon pe lafz na gin kapkapahaTen pahchan

main pankhuDi ki tarah apne honT wa kar dun

tu titliyon ki tarah gungunahaTen pahchan

mahaz khol diya hai to gahri nind na so

hawa ke bhes mein hain sansanahaTen pahchan

ye jhuTe nag hain magar husn se tarashe hain

tu jauhari hai agar jagmagahaTen pahchan

wo kala sanp hai tujh ko nazar na aaega

tu jhaDiyon mein chhupi sarsarahaTen pahchan

'nazir' log to chehre badalte rahte hain

tu itna sada na ban muskurahaTen pahchan