KHud apne qatl ka ilzam Dho raha hun abhi

ḳhud apne qatl kā ilzām Dho rahā huuñ abhī

maiñ apnī laash pe sar rakh ke ro rahā huuñ abhī

usī pe fasl khaḌī hogī ik sadāoñ kī

maiñ jis zamīn pe ḳhāmoshī bo rahā huuñ abhī

sab apnī apnī fasīleñ haTā leñ raste se

maiñ apnī raah kī dīvār ho rahā huuñ abhī

kaho ki dasht abhī thoḌā intizār kare

maiñ apne paaoñ nadī meñ bhigo rahā huuñ abhī

maiñ tujh ko pheñk bhī saktā thā zindagī lekin

kisī umiid pe ye bojh Dho rahā huuñ abhī

bahut sī āñkheñ mirī raah dekhtī hoñgī

maiñ ek ḳhvāb huuñ ta.abīr ho rahā huuñ abhī

KHud apne qatl ka ilzam Dho raha hun abhi

main apni lash pe sar rakh ke ro raha hun abhi

usi pe fasl khaDi hogi ek sadaon ki

main jis zamin pe KHamoshi bo raha hun abhi

sab apni apni fasilen haTa len raste se

main apni rah ki diwar ho raha hun abhi

kaho ki dasht abhi thoDa intizar kare

main apne paon nadi mein bhigo raha hun abhi

main tujh ko phenk bhi sakta tha zindagi lekin

kisi umid pe ye bojh Dho raha hun abhi

bahut si aankhen meri rah dekhti hongi

main ek KHwab hun tabir ho raha hun abhi