kitne mausam sargardan the mujhse hath milane mein

kitne mausam sargardāñ the mujh se haath milāne meñ

maiñ ne shāyad der lagā dī ḳhud se bāhar aane meñ

ek nigāh kā sannāTā hai ik āvāz kā banjar-pan

maiñ kitnā tanhā baiThā huuñ qurbat ke vīrāne meñ

aaj us phuul kī ḳhushbū mujh meñ paiham shor machātī hai

jis ne be-had ujlat bartī khilne aur murjhāne meñ

ek malāl kī gard sameTe maiñ ne ḳhud ko paar kiyā

kaise kaise vasl guzāre hijr kā zaḳhm chhupāne meñ

jitne dukh the jitnī umīdeñ sab se barābar kaam liyā

maiñ ne apne ā.inda kī ik tasvīr banāne meñ

ek vazāhat ke lamhe meñ mujh par ye ahvāl khulā

kitnī mushkil pesh aatī hai apnā haal batāne meñ

pahle dil ko aas dilā kar be-parvā ho jaatā thā

ab to 'azm' bikhar jaatā huuñ maiñ ḳhud ko bahlāne meñ

kitne mausam sargardan the mujh se hath milane mein

main ne shayad der laga di KHud se bahar aane mein

ek nigah ka sannaTa hai ek aawaz ka banjar-pan

main kitna tanha baiTha hun qurbat ke virane mein

aaj us phul ki KHushbu mujh mein paiham shor machati hai

jis ne be-had ujlat barti khilne aur murjhane mein

ek malal ki gard sameTe main ne KHud ko par kiya

kaise kaise wasl guzare hijr ka zaKHm chhupane mein

jitne dukh the jitni umiden sab se barabar kaam liya

main ne apne aainda ki ek taswir banane mein

ek wazahat ke lamhe mein mujh par ye ahwal khula

kitni mushkil pesh aati hai apna haal batane mein

pahle dil ko aas dila kar be-parwa ho jata tha

ab to 'azm' bikhar jata hun main KHud ko bahlane mein