mujhse aazurda jo us gul-ru ko ab pate hain log

mujh se āzurda jo us gul-rū ko ab paate haiñ log

aur hī rañgat se kuchh kuchh aa ke farmāte haiñ log

jab se jaanā band merā ho gayā ai hamdamo

tab se un ke ghar meñ har har tarah ke aate haiñ log

mere āh-e-sard kī tāsīr us ke dil meñ dekh

haa.e kis kis tarah mujh par us ko garmāte haiñ log

jab vo ghabrāte the mujh se tab the un ke ghar ke ḳhush

ab jo vo ḳhush haiñ to un ke ghar ke ghabrāte haiñ log

koī samjhāo unheñ bahr-e-ḳhudā ai momino

us sanam ke ishq meñ jo mujh ko samjhāte haiñ log

roz-e-hijrāñ to dikhāyā sau fareboñ se mujhe

dekhiye ab aur kyā kyā haa.e dikhlāte haiñ log

jo lagāte the bujhāte the hamesha un se aah

vo hī ab nā-chār 'ġhamgīñ' mujh se sharmāte haiñ log

mujh se aazurda jo us gul-ru ko ab pate hain log

aur hi rangat se kuchh kuchh aa ke farmate hain log

jab se jaana band mera ho gaya ai hamdamo

tab se un ke ghar mein har har tarah ke aate hain log

mere aah-e-sard ki tasir us ke dil mein dekh

hae kis kis tarah mujh par us ko garmate hain log

jab wo ghabraate the mujh se tab the un ke ghar ke KHush

ab jo wo KHush hain to un ke ghar ke ghabraate hain log

koi samjhao unhen bahr-e-KHuda ai momino

us sanam ke ishq mein jo mujh ko samjhate hain log

roz-e-hijran to dikhaya sau farebon se mujhe

dekhiye ab aur kya kya hae dikhlate hain log

jo lagate the bujhate the hamesha un se aah

wo hi ab na-chaar 'ghamgin' mujh se sharmate hain log