naqsh ki tarah ubharna bhi tumhi se sikha

naqsh kī tarah ubharnā bhī tumhī se sīkhā

rafta rafta nazar aanā bhī tumhī se sīkhā

tum se hāsil huā ik gahre samundar kā sukūt

aur har mauj se laḌnā bhī tumhī se sīkhā

achchhe sheroñ kī parakh tum ne hī sikhlā.ī mujhe

apne andāz se kahnā bhī tumhī se sīkhā

tum ne samjhā.e mirī soch ko ādāb adab

lafz o ma.anī se ulajhnā bhī tumhī se sīkhā

rishta-e-nāz ko jaanā bhī to tum se jaanā

jāma-e-faḳhr pahannā bhī tumhī se sīkhā

chhoTī sī baat pe ḳhush honā mujhe aatā thā

par baḌī baat pe chup rahnā tumhī se sīkhā

naqsh ki tarah ubharna bhi tumhi se sikha

rafta rafta nazar aana bhi tumhi se sikha

tum se hasil hua ek gahre samundar ka sukut

aur har mauj se laDna bhi tumhi se sikha

achchhe sheron ki parakh tum ne hi sikhlai mujhe

apne andaz se kahna bhi tumhi se sikha

tum ne samjhae meri soch ko aadab adab

lafz o mani se ulajhna bhi tumhi se sikha

rishta-e-naz ko jaana bhi to tum se jaana

jama-e-faKHr pahanna bhi tumhi se sikha

chhoTi si baat pe KHush hona mujhe aata tha

par baDi baat pe chup rahna tumhi se sikha