wahshat si wahshat hoti hai

vahshat sī vahshat hotī hai

zinda huuñ hairat hotī hai

jal bujhne vāloñ se pūchho

ġham kī kyā hiddat hotī hai

rehn na rakh denā bīnā.ī

is kī bhī muddat hotī hai

saare qarz chukā dene kī

kabhī kabhī ujlat hotī hai

dil aur jaan ke saude jo haiñ

in meñ kab hujjat hotī hai

ḳhud se jhuuT kahāñ tak boleñ

thoḌī sī ḳhiffat hotī hai

apne aap se milne meñ bhī

ab kitnī diqqat hotī hai

ḳhud se bāteñ karne kī bhī

ab kis ko fursat hotī hai

kuchh kah lo rūkhī-sūkhī meñ

apne haañ barakat hotī hai

sonā sī miTTī ke ghar meñ

kab ham se mehnat hotī hai

dhaan hamāre chiḌiyā khā.eñ

chiḌiyoñ ko aadat hotī hotī hai

bachchoñ se kyā shikva karnā

miTTī meñ ulfat hotī hai

sabz kivāḌoñ kī jhurriyoñ meñ

jugnū yā hairat hotī hai

TaaT ke maT-maile pardoñ meñ

kyā ujlī rañgat hotī hai

phaTī purānī sī chunarī meñ

kyā bholī sūrat hotī hai

chāval kī piilī roTī meñ

kyā soñdhī lazzat hotī hai

rullī ke ek ik Tāñke meñ

poroñ kī chāhat hotī hai

jaaḌe oḌh ke so jaane meñ

kab koī zahmat hotī hai

shaam ko terā hañs kar milnā

din bhar kī ujrat hotī hai

wahshat si wahshat hoti hai

zinda hun hairat hoti hai

jal bujhne walon se puchho

gham ki kya hiddat hoti hai

rehn na rakh dena binai

is ki bhi muddat hoti hai

sare qarz chuka dene ki

kabhi kabhi ujlat hoti hai

dil aur jaan ke saude jo hain

in mein kab hujjat hoti hai

KHud se jhuT kahan tak bolen

thoDi si KHiffat hoti hai

apne aap se milne mein bhi

ab kitni diqqat hoti hai

KHud se baaten karne ki bhi

ab kis ko fursat hoti hai

kuchh kah lo rukhi-sukhi mein

apne han barakat hoti hai

sona si miTTi ke ghar mein

kab hum se mehnat hoti hai

dhan hamare chiDiya khaen

chiDiyon ko aadat hoti hoti hai

bachchon se kya shikwa karna

miTTi mein ulfat hoti hai

sabz kiwaDon ki jhurriyon mein

jugnu ya hairat hoti hai

TaT ke maT-maile pardon mein

kya ujli rangat hoti hai

phaTi purani si chunari mein

kya bholi surat hoti hai

chawal ki pili roTi mein

kya sondhi lazzat hoti hai

rulli ke ek ek Tanke mein

poron ki chahat hoti hai

jaDe oDh ke so jaane mein

kab koi zahmat hoti hai

sham ko tera hans kar milna

din bhar ki ujrat hoti hai