yaadon ka lams zehn ko chhu kar guzar gaya

yādoñ kā lams zehn ko chhū kar guzar gayā

nashtar sā mere jism meñ jaise utar gayā

maujoñ kā shor mujh ko Darātā rahā magar

paanī meñ paañv rakhte hī dariyā utar gayā

pairoñ pe har taraf hī havāoñ kā raqs thā

ab sochtā huuñ aaj vo manzar kidhar gayā

do din meñ ḳhāl-o-ḳhat mire tabdīl ho ga.e

ā.īna dekhte hī maiñ apne se Dar gayā

apnā makān bhī thā usī moḌ par magar

jaane maiñ kis ḳhayāl meñ auroñ ke ghar gayā

us din mirā ye dil to bahut hī udaas thā

shāyad sukūn hī ke liye dar-ba-dar gayā

maiñ sañg huuñ na aur vo shīsha hī thā magar

'aslam' jo us ko haath lagāyā bikhar gayā

yaadon ka lams zehn ko chhu kar guzar gaya

nashtar sa mere jism mein jaise utar gaya

maujon ka shor mujh ko Daraata raha magar

pani mein panw rakhte hi dariya utar gaya

pairon pe har taraf hi hawaon ka raqs tha

ab sochta hun aaj wo manzar kidhar gaya

do din mein KHal-o-KHat mere tabdil ho gae

aaina dekhte hi main apne se Dar gaya

apna makan bhi tha usi moD par magar

jaane main kis KHayal mein auron ke ghar gaya

us din mera ye dil to bahut hi udas tha

shayad sukun hi ke liye dar-ba-dar gaya

main sang hun na aur wo shisha hi tha magar

'aslam' jo us ko hath lagaya bikhar gaya