حکیم اجمل خان صاحب کا خاندان وہی مشہور خاندان ہے جو تاریخ طب میں خاندان شریفی کے نام سے منسوب ہے اور جس کے جد امجد حکیم فاضل خان صاحب تھے۔ حکیم صاحب ایک بے باک سیاست دان ، ہمدردِ قوم ، محقِّق ، مُصنِّف ، مربی، منتظم ، حاذِق ، معالج اور نامور طبیب تھے۔ آپ کی علمی صلاحیتوں اور فنی لیاقتوں کے اعتراف میں حکومتِ ہند نے 1908ء میں "حاذِق الملک" کے خطاب سے نوازا۔ طِبِّی خدمات کے اعتبار سے حکیم اجمل خان کو یونانی طِب کی نشاۃِ ثانیہ کا علم بردار سمجھا جاتا ہے۔حکیم اجمل خان صاحب کو شاعری سے بھی شغف تھا اور شیدا تخلص فرماتے تھے۔ زیر نظر کتاب محمد اجمل خان کے فارسی اور اردو کلام کا مجموعہ ہے۔ بلاشبہ حکیم صاحب نے اردو اور فارسی دونوں زبانوں میں شاعری کی۔ لیکن ان کو مذکورہ بالا مصروفیات نے بہت زیادہ شاعری کرنے اجازت نہیں دی۔

حافظ حکیم محمد اجمل خاں نام ، شیداؔ تخلص ۔ مسیح الملک خطاب۔ ۱۲؍فروری ۱۸۶۸ء کو دہلی میں پیدا ہوئے۔ حدیث، منطق ، فلسفہ ، ادب اور طبیعات کی تعلیم حاصل کی۔ آپ کے خاندان میں عالمگیر کے وقت سے طبابت چلی آتی ہے ۔ اجمل خاں ایک نامور طبیب اور بڑے سیاسی لیڈر تھے۔ طبیہ کالج، دہلی کا قیام آپ ہی کی کوششوں کا نتیجہ تھا۔اردو اور فارسی زبانوں میں شعر کہتے تھے۔ جدوجہد آزادی کے سرگرم کارکن تھے۔ ۲۹؍دسمبر۱۹۲۷ء کو رام پور میں انتقال کرگئے۔ ایک رپورٹ کے مطابق نواب رام پور نے انھیں زہر دے دیا تھا۔ یہ نواب رام پور کے شاہی معالج تھے۔ آپ کا مجموعہ کلام’’دیوان شیدا‘‘ کے نام سے چھپ گیا ہے۔