ماہر لسانیات پروفیسر مسعود حسین خاں نے اردو زبان و ادب کی گراں قدر خدمات انجام دی ہیں۔ مسعود حسین خاں شاعر بھی ہیں۔ "روپ بنگال" اور "دونیم" ان کے شعری مجموعے ہیں۔ زیر تبصرہ آخر الذکر "دو نیم" ان کا شعری مجموعہ ہے، اس کی ابتدا میں مسعود حسین نے فن شعر سے متعلق وقیع گفتگو کی ہے، اور اپنے فن کی کیفیت سے بھی واقف کرایا ہے، مجموعہ میں غزل نظم اور گیت جیسی اہم اصناف شعر شامل ہیں، نظمیں مسائل زندگی کا تذکرہ کرتی ہیں، محبوب کے سراپا کو پیش کرتی ہیں، وطن کی محبت کو آشکار کرتی ہیں، شاعر کے جذبات و احساسات سے واقف کراتی ہیں، زندگی کا خلا، خواب سنگ، یوم آزادی، ہند کی یہ شب ماہتاب نظمیں مطالعہ کرنے سے شاعر کی فکری اساس کو سمجھا جاسکتا ہے، بچے کی ولادت پر ننھا شاہ کار اور شاگرد کے انتقال پر اشعر کی موت نظمیں کہی گئی ہیں، جو متضاد کیفیت میں شاعر کے قلبی احساسات کی ترجمانی کرتی ہیں، غزل میں روایتی موضوعات کو بڑی خوبی سے برتا گیا ہے، اس کے علاوہ زمانے کے احوال بھی اشعار میں پیش کئے گئے ہیں، لیکن غزل کی رمزیت پر حرف نہیں آیا ہے، گیتوں میں محبوب کے حسن و جمال کا تذکرہ کیا گیا ہے، اس کے علاوہ جشن آزادی اور باپو پر بھی گیت شامل ہے، روپ بنگال اس مجموعہ کا اہم اور طویل گیت ہے، جو 1947کے عالم کرب کی یاد دلاتا ہے۔

ممتاز محقق، نامور نقاد اور مشہور ماہر لسانیات پروفیسر مسعود حسین خاں نے اردو زبان و ادب کی گراں قدر خدمات انجام دی ہیں۔ شعر و ادب کی دنیا میں ان کے کارنامے ناقابل فراموش ہیں۔

مسعود حسین خاں، وطن قائم گنج (اترپردیش) میں پیدا ہوئے اور ڈھاکہ (بنگلہ دیش) میں تعلیم کے ابتدائی مراحل طے کرنے کے بعد علی گڑھ مسلم یونیورسٹی سے ایم۔ اے اور پی۔ ایچ ڈی کی اسناد حاصل کیں۔ مزید تعلیم کے لئے یورپ گئے اور پیرس یونیورسٹی سے لسانیات میں ڈی۔ لٹ کی ڈگری لی۔ ہندوستان واپس آ کر آل انڈیا ریڈیو سے بہ سلسلۂ ملازمت  منسلک ہوگئے۔ لیکن یہ ان کا پسندیدہ مشغلہ نہیں تھا۔ اصل دلچسپی درس وتدریس سے تھی ریڈیو کی ملازمت سے سبکدوشی ہو کر علی گڑھ مسلم یونیورسٹی کے شعبۂ اردو میں لکچرر ہوگئے۔ کچھ عرصے بعد عثمانیہ یونیورسٹی کے شعبۂ اردو میں پروفیسر ہو کر حیدرآباد چلے گئے۔ پھر علی گڑھ مسلم یونیورسٹی کے شعبۂ لسانیات میں پہلے پروفیسر و صدر کا عہدہ سنبھالا۔ یونیورسٹی آف کیلی فورنیا (امریکہ) اور کشمیر یونیورسٹی سری نگر میں وزیٹنگ پروفیسر بھی رہے۔ 1973ء میں جامعہ ملیہ اسلامیہ، نئی دہلی کے وائس چانسلر مقرر ہوئے۔ وہاں سے سبکدوشی ہونے کے بعد جامعہ اردو علی گڑھ کے اعزازی وائس چانسلر اور علی گڑھ یونیورسٹی کے شعبۂ لسانیات کے پروفیسر ایمریٹس کے عہدوں پر فائز ہوئے اور علی گڑھ میں رہائش اختیار کر کے تصنیف و تالیف میں مصروف ہوگئے۔ علمی ادبی خدمات کے اعتراف میں انہیں ساہتیہ اکاڈمی اوارڈ 1984ء سے نوازا گیا۔

مسعود حسین خاں شاعر بھی ہیں۔ ’’روپ بنگال‘‘ اور ’’دونیم‘‘ ان کے شعری مجموعے ہیں۔ ’’روپ بنگال‘‘ کا ہندی میں ترجمہ بھی ہو چکا ہے۔ بکٹ کہانی، عاشورہ نامہ اور مثنوی کدم راؤ پدم راؤ سائنٹیفک اصولوں پر ترتیب دے کر انہوں نے قابل قدر خدمت انجام دی۔

حیدرآباد میں قیام کے دوران ’’قدیم اردو‘‘ کے نام سے انہوں نے ایک تحقیقی جریدہ جاری کیا تھا جس کا مقصد تھا جدید اصول کی بنیاد پر قدیم متون کی اشاعت۔ ایک لغت کی تیاری کا کام بھی انہوں نے انجام دیا۔ ’’اقبال کی نظری و عملی شعریات‘‘ میں اقبال کی شاعری کا لسانیات کی روشنی میں مطالعہ کیا گیا ہے۔ شعر و زبان، اردو زبان و ادب اور اردو کا المیہ مضامین کے مجموعے ہیں۔ لسانیات کو یہاں بھی مرکز حیثیت حاصل ہے۔ ’’مقدمہ تاریخ زبان اردو‘‘ ان کا سب سے اہم کارنامہ ہے۔ اس میں اردو کے آغاز و ارتقا کے مسئلے پر مدلل بحث کی گئی ہے۔