na koi ranj na dil mein malal rakhta hun

na koī ranj na dil meñ malāl rakhtā huuñ

milan ke silsile har dam bahāl rakhtā huuñ

mirī nazar meñ sabhī yaar mohtaram haiñ mire

maiñ khoTe sikke bhī aksar sañbhāl rakhtā huuñ

maiñ bechtā nahīñ afkār zar ke badle meñ

rivāyatoñ se maiñ rishte bahāl rakhtā huuñ

maiñ chāñd haath meñ lene kī zid nahīñ kartā

maiñ ḳhvāhishoñ ko sadā hasb-e-hāl rakhtā huuñ

shaguftagī hai virāsat mire buzurgoñ kī

maiñ guftugū ke hunar meñ kamāl rakhtā huuñ

maiñ ḳhāmushī ko samajhtā nahīñ burā lekin

jahāñ savāl ho lāzim savāl rakhtā huuñ

mirī sarisht meñ shāmil hai 'ājizī lekin

maiñ saath saath ḳhudī kā ḳhayāl rakhtā huuñ

mohabbatoñ ke asāse na haath se jaa.eñ

so fikr-e-fardā ko fardā pe Taal rakhtā huuñ

bajā ki rāh-e-talab hai bahut kaThin 'arshad'

maiñ hausle bhī magar be-misāl rakhtā huuñ

na koi ranj na dil mein malal rakhta hun

milan ke silsile har dam bahaal rakhta hun

meri nazar mein sabhi yar mohtaram hain mere

main khoTe sikke bhi aksar sanbhaal rakhta hun

main bechta nahin afkar zar ke badle mein

riwayaton se main rishte bahaal rakhta hun

main chand hath mein lene ki zid nahin karta

main KHwahishon ko sada hasb-e-haal rakhta hun

shaguftagi hai wirasat mere buzurgon ki

main guftugu ke hunar mein kamal rakhta hun

main KHamushi ko samajhta nahin bura lekin

jahan sawal ho lazim sawal rakhta hun

meri sarisht mein shamil hai 'ajizi lekin

main sath sath KHudi ka KHayal rakhta hun

mohabbaton ke asase na hath se jaen

so fikr-e-farda ko farda pe Tal rakhta hun

baja ki rah-e-talab hai bahut kaThin 'arshad'

main hausle bhi magar be-misal rakhta hun