aalam-e-wajd mein hoti hai dua raat ke waqt

'ālam-e-vajd meñ hotī hai du'ā raat ke vaqt

maañg suntā hai faqīroñ kī ḳhudā raat ke vaqt

sham' kī lau se thiraktī huī kirneñ niklīñ

ek saaya mirā ham-raqs huā raat ke vaqt

hai ye ummīd mire ḳhvāb meñ aap ā.eñge

ek dar aañkh kā rakhtā huuñ khulā raat ke vaqt

din guzartā hai gulāboñ kī kifālat karte

chūmtī hai mire hāthoñ ko sabā raat ke vaqt

aañkh kholī to bikhar jā.eñge ḳhvāboñ ke varaq

tez chaltī hai jazīroñ meñ havā raat ke vaqt

tīrgī meñ to ziyāda nazar aatā hai mujhe

mujh pe har nuur kā e'jāz khulā raat ke vaqt

oḌh letā hai badan ruuh kī chādar 'āsim'

aur hotī hai mire tan pe qabā raat ke vaqt

'alam-e-wajd mein hoti hai du'a raat ke waqt

mang sunta hai faqiron ki KHuda raat ke waqt

sham' ki lau se thirakti hui kirnen niklin

ek saya mera ham-raqs hua raat ke waqt

hai ye ummid mere KHwab mein aap aaenge

ek dar aankh ka rakhta hun khula raat ke waqt

din guzarta hai gulabon ki kifalat karte

chumti hai mere hathon ko saba raat ke waqt

aankh kholi to bikhar jaenge KHwabon ke waraq

tez chalti hai jaziron mein hawa raat ke waqt

tirgi mein to ziyaada nazar aata hai mujhe

mujh pe har nur ka e'jaz khula raat ke waqt

oDh leta hai badan ruh ki chadar 'asim'

aur hoti hai mere tan pe qaba raat ke waqt