aankhon ke aainon mein tawanai aaegi

āñkhoñ ke ā.inoñ meñ tavānā.ī aa.egī

dekhegā sabz khet to bīnā.ī aa.egī

pā.egā ḳhushbuoñ se zamīnoñ ke bhed bhī

ik roz tere kaam shanāsā.ī aa.egī

peḌoñ kī chhāñv chhoḌ kisī āb-e-jū pe baiTh

tujh meñ nahīñ to aks meñ ra.anā.ī aa.egī

duniyā kī sair kar ke nikhar jā.egā ḳhayāl

taaza havā lagegī to dānā.ī aa.egī

har naqsh āb-o-ḳhāk kā dil meñ utaar le

fankār hai to tāqat-e-goyā.ī aa.egī

shā.ir kī tarah Dol rahā hai ḳhalāoñ meñ

logoñ meñ baiTh anjuman-ārā.ī aa.egī

andhoñ ke is nagar meñ diye kī misāl ban

sahrā meñ gul khulegā to yaktā.ī aa.egī

shaffāf pāniyoñ kī tarah zindagī guzār

sūraj kī tarah tujh meñ tavānā.ī aa.egī

ghar meñ diyā jalā ki lage boltā huā

dīvār-o-dar pe zīnat-o-zebā.ī aa.egī

saaya bhī terā tujh ko kahīñ chhoḌ jā.egā

aa.ī bhī tere kaam to tanhā.ī aa.egī

garmī bahut hai aaj khulā rakh makān ko

us kī galī se raat ko purvā.ī aa.egī

kaafī hai jo ġhazal ke liye kah liyā 'ḳhalīl'

aage qadam rakhegā to gahrā.ī aa.egī

aankhon ke aainon mein tawanai aaegi

dekhega sabz khet to binai aaegi

paega KHushbuon se zaminon ke bhed bhi

ek roz tere kaam shanasai aaegi

peDon ki chhanw chhoD kisi aab-e-ju pe baiTh

tujh mein nahin to aks mein ranai aaegi

duniya ki sair kar ke nikhar jaega KHayal

taza hawa lagegi to danai aaegi

har naqsh aab-o-KHak ka dil mein utar le

fankar hai to taqat-e-goyai aaegi

shair ki tarah Dol raha hai KHalaon mein

logon mein baiTh anjuman-arai aaegi

andhon ke is nagar mein diye ki misal ban

sahra mein gul khulega to yaktai aaegi

shaffaf paniyon ki tarah zindagi guzar

suraj ki tarah tujh mein tawanai aaegi

ghar mein diya jala ki lage bolta hua

diwar-o-dar pe zinat-o-zebai aaegi

saya bhi tera tujh ko kahin chhoD jaega

aai bhi tere kaam to tanhai aaegi

garmi bahut hai aaj khula rakh makan ko

us ki gali se raat ko purwai aaegi

kafi hai jo ghazal ke liye kah liya 'KHalil'

aage qadam rakhega to gahrai aaegi