ab batao jaegi zindagi kahan yaro

ab batāo jā.egī zindagī kahāñ yaaro

phir haiñ barq kī nazreñ sū-e-āshiyāñ yaaro

ab na koī manzil hai aur na rahguzar koī

jaane qāfila bhaTke ab kahāñ kahāñ yaaro

phuul haiñ ki lāsheñ haiñ baaġh hai ki maqtal hai

shāḳh shāḳh hotā hai daar kā gumāñ yaaro

maut se guzar kar ye kaisī zindagī paa.ī

fikr pā-ba-jaulāñ hai guñg hai zabāñ yaaro

turbatoñ kī sham.eñ haiñ aur gahrī ḳhāmoshī

jā rahe the kis jānib aa ga.e kahāñ yaaro

rāhzan ke baare meñ aur kyā kahūñ khul kar

mīr-e-kārvāñ yaaro mīr-e-kārvāñ yaaro

sirf zinda rahne ko zindagī nahīñ kahte

kuchh ġham-e-mohabbat ho kuchh ġham-e-jahāñ yaaro

vaqt kā taqāzā to aur bhī hai kuchh lekin

kuchh nahīñ to ho jaao mere ham-zabāñ yaaro

ek maiñ huuñ jis ko tum mānte nahīñ 'shā.ir'

aur ek maiñ hī huuñ tum meñ nukta-dāñ yaaro

ab batao jaegi zindagi kahan yaro

phir hain barq ki nazren su-e-ashiyan yaro

ab na koi manzil hai aur na rahguzar koi

jaane qafila bhaTke ab kahan kahan yaro

phul hain ki lashen hain bagh hai ki maqtal hai

shaKH shaKH hota hai dar ka guman yaro

maut se guzar kar ye kaisi zindagi pai

fikr pa-ba-jaulan hai gung hai zaban yaro

turbaton ki shamen hain aur gahri KHamoshi

ja rahe the kis jaanib aa gae kahan yaro

rahzan ke bare mein aur kya kahun khul kar

mir-e-karwan yaro mir-e-karwan yaro

sirf zinda rahne ko zindagi nahin kahte

kuchh gham-e-mohabbat ho kuchh gham-e-jahan yaro

waqt ka taqaza to aur bhi hai kuchh lekin

kuchh nahin to ho jao mere ham-zaban yaro

ek main hun jis ko tum mante nahin 'shair'

aur ek main hi hun tum mein nukta-dan yaro