aish kar KHuban mein ai dil shadmani phir kahan

aish kar ḳhūbāñ meñ ai dil shādmānī phir kahāñ

shādmānī gar huī to zindagānī phir kahāñ

jis qadar piinā ho pī le paanī un ke haath se

āb-e-jannat to bahut hogā ye paanī phir kahāñ

lazzateñ jannat ke meve kī bahut hoñgī vahāñ

phir ye mīThī gāliyāñ ḳhūbāñ kī khānī phir kahāñ

vaañ to haañ hūroñ ke gahne ke bahut hoñge nishāñ

in parī-zādoñ ke chhalloñ kī nishānī phir kahāñ

ulfat-o-mahr-o-mohabbat sab haiñ jīte-jī ke saath

mehrbāñ hī uTh ga.e ye mehrbānī phir kahāñ

vaa.iz o nāseh bakeñ to un ke kahne ko na maan

dam ġhanīmat hai miyāñ ye naujavānī phir kahāñ

jā paḌe chup ho ke jab shahr-e-ḳhamoshāñ meñ 'nazīr'

ye ġhazal ye reḳhta ye sher-ḳhvānī phir kahāñ

aish kar KHuban mein ai dil shadmani phir kahan

shadmani gar hui to zindagani phir kahan

jis qadar pina ho pi le pani un ke hath se

aab-e-jannat to bahut hoga ye pani phir kahan

lazzaten jannat ke mewe ki bahut hongi wahan

phir ye miThi galiyan KHuban ki khani phir kahan

wan to han huron ke gahne ke bahut honge nishan

in pari-zadon ke chhallon ki nishani phir kahan

ulfat-o-mahr-o-mohabbat sab hain jite-ji ke sath

mehrban hi uTh gae ye mehrbani phir kahan

waiz o naseh baken to un ke kahne ko na man

dam ghanimat hai miyan ye naujawani phir kahan

ja paDe chup ho ke jab shahr-e-KHamoshan mein 'nazir'

ye ghazal ye reKHta ye sher-KHwani phir kahan