chahat meri miTTi mein ajab chhoD gaya hai

chāhat mirī miTTī meñ ajab chhoḌ gayā hai

dil jal ke bhī ḳhāshāk-talab chhoḌ gayā hai

jab chhoḌ gayā thā to kahāñ chhoḌ gayā thā

lauTā hai to lagtā hai ki ab chhoḌ gayā hai

maiñ terā pujārī thā magar ai mire ḳhurshīd

tū Dhal ke mire shahr meñ shab chhoḌ gayā hai

pahuñchā hai masīhā.ī ko is rah se guzar kar

is rah ko magar jān-ba-lab chhoḌ gayā hai

ham lazzat-e-āshob ke rasiyā tire ġham-dār

tū siine meñ jiine kā sabab chhoḌ gayā hai

ġham us kī judā.ī kā tujhe maar na Daale

ab tū bhī use chhoḌ vo jab chhoḌ gayā hai

dānista yahīñ chhoḌ gayā hai vo mirā dil

jo us kā thā asbāb vo sab chhoḌ gayā hai

kuchh din se mire dil meñ ibādat kī talab hai

kuchh din se mujhe lagtā hai rab chhoḌ gayā hai

ik phal ke ravādār na the ḳhuld-e-barīñ meñ

dil terī bahishtoñ kī talab chhoḌ gayā hai

chahat meri miTTi mein ajab chhoD gaya hai

dil jal ke bhi KHashak-talab chhoD gaya hai

jab chhoD gaya tha to kahan chhoD gaya tha

lauTa hai to lagta hai ki ab chhoD gaya hai

main tera pujari tha magar ai mere KHurshid

tu Dhal ke mere shahr mein shab chhoD gaya hai

pahuncha hai masihai ko is rah se guzar kar

is rah ko magar jaan-ba-lab chhoD gaya hai

hum lazzat-e-ashob ke rasiya tere gham-dar

tu sine mein jine ka sabab chhoD gaya hai

gham us ki judai ka tujhe mar na Dale

ab tu bhi use chhoD wo jab chhoD gaya hai

danista yahin chhoD gaya hai wo mera dil

jo us ka tha asbab wo sab chhoD gaya hai

kuchh din se mere dil mein ibaadat ki talab hai

kuchh din se mujhe lagta hai rab chhoD gaya hai

ek phal ke rawadar na the KHuld-e-barin mein

dil teri bahishton ki talab chhoD gaya hai