wo jit raha hai na mujhe haar raha hai

vo jiit rahā hai na mujhe haar rahā hai

is tarh vo qistoñ meñ mujhe maar rahā hai

hai chehre badalne meñ use ḳhuub mahārat

shāyad vo ga.e vaqt meñ fankār rahā hai

har baar palaT jaatī hai jiitī huī baazī

lagtā hai safoñ meñ koī ġhaddār rahā hai

sāhil pe pahuñchte hī jise pheñk rahe ho

ye shaḳhs bhañvar meñ tirī patvār rahā hai

ik khel hai kursī kā mire des meñ jaarī

ik putlī tamāshā yahāñ har baar rahā hai

talchhaT bhī mayassar nahīñ ab jaam kī jis ko

sunte haiñ balā kā kabhī mai-ḳhvār rahā hai

sau baar dil-e-zār ko vo rauñd ke guzrā

dil hai ki usī kā hī lagātār rahā hai

ummīd thī jis shaḳhs pe tā'mīr karegā

'arshad' vahī kartā mujhe mismār rahā hai

wo jit raha hai na mujhe haar raha hai

is tarh wo qiston mein mujhe mar raha hai

hai chehre badalne mein use KHub mahaarat

shayad wo gae waqt mein fankar raha hai

har bar palaT jati hai jiti hui bazi

lagta hai safon mein koi ghaddar raha hai

sahil pe pahunchte hi jise phenk rahe ho

ye shaKHs bhanwar mein teri patwar raha hai

ek khel hai kursi ka mere des mein jari

ek putli tamasha yahan har bar raha hai

talchhaT bhi mayassar nahin ab jam ki jis ko

sunte hain bala ka kabhi mai-KHwar raha hai

sau bar dil-e-zar ko wo raund ke guzra

dil hai ki usi ka hi lagatar raha hai

ummid thi jis shaKHs pe ta'mir karega

'arshad' wahi karta mujhe mismar raha hai