dil mein hai ittifaq se dasht bhi ghar ke sath sath

dil meñ hai ittifāq se dasht bhī ghar ke saath saath

is meñ qayām bhī kareñ aap safar ke saath saath

dard kā dil kā shaam kā bazm kā mai kā jaam kā

rañg badal badal gayā ek nazar ke saath saath

ḳhvāb uḌā diye ga.e peḌ girā diye ga.e

donoñ bhulā diye ga.e ek ḳhabar ke saath saath

shāḳh se is kitāb tak ḳhaak se le ke ḳhvāb tak

jā.egā dil kahāñ talak us gul-e-tar ke saath saath

is ko ġhazal samajh ke hī sarsarī dekhiye sahī

ye mirā hāl-e-dil bhī hai arz-e-hunar ke saath saath

dil mein hai ittifaq se dasht bhi ghar ke sath sath

is mein qayam bhi karen aap safar ke sath sath

dard ka dil ka sham ka bazm ka mai ka jam ka

rang badal badal gaya ek nazar ke sath sath

KHwab uDa diye gae peD gira diye gae

donon bhula diye gae ek KHabar ke sath sath

shaKH se is kitab tak KHak se le ke KHwab tak

jaega dil kahan talak us gul-e-tar ke sath sath

is ko ghazal samajh ke hi sarsari dekhiye sahi

ye mera haal-e-dil bhi hai arz-e-hunar ke sath sath