do Tuk

shādī ke chand roz to chheḌī na koī baat

haa.il hamāre beach rahe kuchh takallufāt

phir ek din jo un se mirī guftugū huī

do Tuuk bāt-chīt huī dū-badū huī

pūchhā ki nāshte kā koī intizām hai

bolīñ mujhe patā ho tū mujh par harām hai

maiñ ne kahā ki chaa.e kī pyālī atā kareñ

kahne lagīñ ki baat na aisī kiyā kareñ

maiñ ne kahā chaleñ zarā anDā ubaal deñ

bolīñ mujhe na aap ye kār-e-muhāl deñ

pūchhā ki jāntī to haiñ chāval ubālnā

bolīñ balā ab apnī mire sar na Dālnā

maiñ ne kahā ki hai koī roTī kā aasrā

bolīñ khule hue to haiñ tandūr jā bajā

maiñ ne kahā ki gosht pakāne kī taab hai

bolīñ kī Tin ke paik meñ sab dastiyāb hai

maiñ ne kahā ki daal yā sabzī banā.iye

kahne lagīñ ḳhayāl ye dil se nikāliye

maiñ ne kahā ki khānā pakānā hai zindagī

bolīñ ki jo pake use khānā hai zindagī

aapas meñ faisla koī karnā thā ham ko aaj

pūchhā karegā kaun bhalā ghar kā kām-kāj

bolīñ ki kaam karne kī ḳhūgar nahīñ huuñ maiñ

biivī huuñ aap kī koī shauhar nahīñ huuñ maiñ

shadi ke chand roz to chheDi na koi baat

hail hamare beach rahe kuchh takallufat

phir ek din jo un se meri guftugu hui

do Tuk baat-chit hui du-badu hui

puchha ki nashte ka koi intizam hai

bolin mujhe pata ho tu mujh par haram hai

main ne kaha ki chae ki pyali ata karen

kahne lagin ki baat na aisi kiya karen

main ne kaha chalen zara anDa ubaal den

bolin mujhe na aap ye kar-e-muhaal den

puchha ki jaanti to hain chawal ubaalna

bolin bala ab apni mere sar na Dalna

main ne kaha ki hai koi roTi ka aasra

bolin khule hue to hain tandur ja baja

main ne kaha ki gosht pakane ki tab hai

bolin ki Tin ke paik mein sab dastiyab hai

main ne kaha ki dal ya sabzi banaiye

kahne lagin KHayal ye dil se nikaliye

main ne kaha ki khana pakana hai zindagi

bolin ki jo pake use khana hai zindagi

aapas mein faisla koi karna tha hum ko aaj

puchha karega kaun bhala ghar ka kaam-kaj

bolin ki kaam karne ki KHugar nahin hun main

biwi hun aap ki koi shauhar nahin hun main