ek hi KHat mein hai kya haal jo mazkur nahin

ek hī ḳhat meñ hai kyā haal jo mazkūr nahīñ

dil to dil 'ishq meñ saada varaq-e-tūr nahīñ

ek ham haiñ ki kisī baat kā maqdūr nahīñ

ek vo haiñ ki kisī rang meñ majbūr nahīñ

imtihāñ-gāh-e-mohabbat nahīñ gul-zār-e-ḳhalīl

kaun aisā hai jo zaḳhmoñ se yahāñ chuur nahīñ

naz' kā vaqt hai baiThā hai sirhāne koī

vaqt ab vo hai ki marnā hameñ manzūr nahīñ

qābil-e-ġhaur hai ai jalva-paristān-e-azal

ye kahānī hai mirī vāqia-e-tūr nahīñ

misr kā chāñd ho āġhosh meñ zindāñ ke tulū'

fitrat-e-husn badal jaa.e to kuchh duur nahīñ

sar jhukā.e dar-e-daulat se palaTne vaale

be-niyāzī kī adā.eñ haiñ vo maġhrūr nahīñ

jubba-sā.ī bhī gavārā nahīñ kartā koī

uTh ke jaanā dar-e-daulat se bhī dastūr nahīñ

'ishq meñ sarhad-e-manzil se kuchh aage hoñge

us kā ronā hai koī sa.i bhī mashkūr nahīñ

dil meñ paivast huī thī jo mire roz-e-azal

hai vahī shoḳh-nazar sā.iqa-e-tūr nahīñ

dil ko bhī dī ga.ī hai ḳhidmat-e-dard-e-abadī

sirf āñkheñ hī mirī rone pe mā'mūr nahīñ

sar-e-mizhgāñ mire aañsū kā sitāra chamkā

daar par ab asar-e-jazba-e-mansūr nahīñ

saad surḳhī se kiyā kis ne sar-e-fard-e-jamāl

apne 'ālam meñ tire dīda-e-maḳhmūr nahīñ

zindagī ḳhatm huī jab to ik āvāz sunī

aa gayā maiñ tire nazdīk bas ab duur nahīñ

ruuh kahtī huī niklī hai dam-e-naz.a 'azīz'

un se is bazm meñ milnā hameñ manzūr nahīñ

ek hi KHat mein hai kya haal jo mazkur nahin

dil to dil 'ishq mein sada waraq-e-tur nahin

ek hum hain ki kisi baat ka maqdur nahin

ek wo hain ki kisi rang mein majbur nahin

imtihan-gah-e-mohabbat nahin gul-zar-e-KHalil

kaun aisa hai jo zaKHmon se yahan chur nahin

naz' ka waqt hai baiTha hai sirhane koi

waqt ab wo hai ki marna hamein manzur nahin

qabil-e-ghaur hai ai jalwa-paristan-e-azal

ye kahani hai meri waqia-e-tur nahin

misr ka chand ho aaghosh mein zindan ke tulu'

fitrat-e-husn badal jae to kuchh dur nahin

sar jhukae dar-e-daulat se palaTne wale

be-niyazi ki adaen hain wo maghrur nahin

jubba-sai bhi gawara nahin karta koi

uTh ke jaana dar-e-daulat se bhi dastur nahin

'ishq mein sarhad-e-manzil se kuchh aage honge

us ka rona hai koi sai bhi mashkur nahin

dil mein paiwast hui thi jo mere roz-e-azal

hai wahi shoKH-nazar saiqa-e-tur nahin

dil ko bhi di gai hai KHidmat-e-dard-e-abadi

sirf aankhen hi meri rone pe ma'mur nahin

sar-e-mizhgan mere aansu ka sitara chamka

dar par ab asar-e-jazba-e-mansur nahin

sad surKHi se kiya kis ne sar-e-fard-e-jamal

apne 'alam mein tere dida-e-maKHmur nahin

zindagi KHatm hui jab to ek aawaz suni

aa gaya main tere nazdik bas ab dur nahin

ruh kahti hui nikli hai dam-e-naza 'aziz'

un se is bazm mein milna hamein manzur nahin