gae manzaron se ye kya uDa hai nigah mein

ga.e manzaroñ se ye kyā uḌā hai nigāh meñ

koī aks hai ki ġhubār sā hai nigāh meñ

hamā-vaqt apnī shabīh ke huuñ maiñ rū-ba-rū

koī ashk hai ki ye ā.īna hai nigāh meñ

koī shahr-e-ḳhvāb guzar rahā hai ḳhayāl se

koī dasht-e-shām sulag rahā hai nigāh meñ

kaf-e-dard se ġham-e-kā.enāt kī gard se

vahī miT rahā hai jo naqsh sā hai nigāh meñ

koī tīrgī hai furāt-e-jāñ meñ ravāñ-davāñ

magar ik charāġh sā tairtā hai nigāh meñ

ga.e mausamoñ kī vo sabz rañg hikāyateñ

koī āb-e-surḳh se likh gayā hai nigāh meñ

gae manzaron se ye kya uDa hai nigah mein

koi aks hai ki ghubar sa hai nigah mein

hama-waqt apni shabih ke hun main ru-ba-ru

koi ashk hai ki ye aaina hai nigah mein

koi shahr-e-KHwab guzar raha hai KHayal se

koi dasht-e-sham sulag raha hai nigah mein

kaf-e-dard se gham-e-kaenat ki gard se

wahi miT raha hai jo naqsh sa hai nigah mein

koi tirgi hai furaat-e-jaan mein rawan-dawan

magar ek charagh sa tairta hai nigah mein

gae mausamon ki wo sabz rang hikayaten

koi aab-e-surKH se likh gaya hai nigah mein