gar dil mein kar ke sair-e-dil-e-dagh-dar dekh

gar dil meñ kar ke sair-e-dil-e-dāġh-dār dekh

ai jaan ḳhāna-e-bāġh kī aa kar bahār dekh

pachhtā.egā jo haath se tū kho.egā hameñ

ham tujh se saaf kahte haiñ o bad-shi.ār dekh

maiñ kyā vahāñ pe gor tujhe de abhī javāb

turbat pe merī aa ke zarā tū pukār dekh

bāhar hoñ apne jaame se gul bulbuleñ to kyā

gulshan meñ imtihān ko poshāk utaar dekh

ab mujh meñ tujh meñ ek sar-e-mū nahīñ hai farq

mū-e-miyāñ milā ke mirā jism-e-zār dekh

ba.ad-e-fanā bhī vā rahīñ āñkheñ to aayā tū

va.ada-ḳhilāfī apnī mirā intizār dekh

hai nūr-e-husn māne-e-dīdār-e-rū-e-yār

āñkheñ ye kah rahī haiñ use baar baar dekh

tū teġh-e-tez khīñche hai maiñ sar jhukā.e huuñ

apne sitam ko dekh mirā inkisār dekh

darpai hue haiñ jaan ke īmāñ to le chuke

but karte haiñ sitam mire parvardigār dekh

panjoñ ke bal zamīñ pe na chal bāñkpan ko chhoḌ

mānind-e-naqsh-e-pā hai ye nā-pā.edār dekh

dikhlā de miiñh barasne meñ bijlī kā kauñdnā

hañs hañs ke jānib-e-miza-e-ashk-bār dekh

kotāh umr ho ga.ī aur ye na kam huī

ai jaan aa ke tūl-e-shab-e-intizār dekh

bad-vaz.a ham ko kah ke banā nek tū che ḳhush

atvār apne dekh hamārā shi.ār dekh

bijlī girā.ī ġhair siyah-rū par ai 'qalaq'

tāsīr-e-garm āh-e-dil-e-be-qarār dekh

gar dil mein kar ke sair-e-dil-e-dagh-dar dekh

ai jaan KHana-e-bagh ki aa kar bahaar dekh

pachhtaega jo hath se tu khoega hamein

hum tujh se saf kahte hain o bad-shiar dekh

main kya wahan pe gor tujhe de abhi jawab

turbat pe meri aa ke zara tu pukar dekh

bahar hon apne jame se gul bulbulen to kya

gulshan mein imtihan ko poshak utar dekh

ab mujh mein tujh mein ek sar-e-mu nahin hai farq

mu-e-miyan mila ke mera jism-e-zar dekh

baad-e-fana bhi wa rahin aankhen to aaya tu

wada-KHilafi apni mera intizar dekh

hai nur-e-husn mane-e-didar-e-ru-e-yar

aankhen ye kah rahi hain use bar bar dekh

tu tegh-e-tez khinche hai main sar jhukae hun

apne sitam ko dekh mera inkisar dekh

darpai hue hain jaan ke iman to le chuke

but karte hain sitam mere parwardigar dekh

panjon ke bal zamin pe na chal bankpan ko chhoD

manind-e-naqsh-e-pa hai ye na-paedar dekh

dikhla de minh barasne mein bijli ka kaundna

hans hans ke jaanib-e-miza-e-ashk-bar dekh

kotah umr ho gai aur ye na kam hui

ai jaan aa ke tul-e-shab-e-intizar dekh

bad-waza hum ko kah ke bana nek tu che KHush

atwar apne dekh hamara shiar dekh

bijli girai ghair siyah-ru par ai 'qalaq'

tasir-e-garm aah-e-dil-e-be-qarar dekh