apni tadbir na taqdir pe rona aaya

apnī tadbīr na taqdīr pe ronā aayā

dekh kar chup tirī tasvīr pe ronā aayā

kyā hasīñ ḳhvāb mohabbat ne dikhā.e the hameñ

jab khulī aañkh to ta.abīr pe ronā aayā

ashk bhar aa.e jo duniyā ne sitam dil pe kiye

apnī luTtī huī jāgīr pe ronā aayā

ḳhūn-e-dil se jo likhā thā vo miTā ashkoñ se

apne hī naame kī tahrīr pe ronā aayā

jab talak qaid the taqdīr pe ham rote the

aaj TuuTī huī zanjīr pe ronā aayā

rāh-e-hastī pe chalā maut kī manzil pe milā

ham ko is raah ke rahgīr pe ronā aayā

jo nishāne pe lagā aur na palaT kar aayā

ham ko 'naushād' usī tiir pe ronā aayā

apni tadbir na taqdir pe rona aaya

dekh kar chup teri taswir pe rona aaya

kya hasin KHwab mohabbat ne dikhae the hamein

jab khuli aankh to tabir pe rona aaya

ashk bhar aae jo duniya ne sitam dil pe kiye

apni luTti hui jagir pe rona aaya

KHun-e-dil se jo likha tha wo miTa ashkon se

apne hi name ki tahrir pe rona aaya

jab talak qaid the taqdir pe hum rote the

aaj TuTi hui zanjir pe rona aaya

rah-e-hasti pe chala maut ki manzil pe mila

hum ko is rah ke rahgir pe rona aaya

jo nishane pe laga aur na palaT kar aaya

hum ko 'naushad' usi tir pe rona aaya